ISHONCHLI HAMKORLIK YO‘LIDA

“O‘zbekiston temir yo‘llari” aksiyadorlik jamiyatida boshqaruv raisining birinchi o‘rinbosari Fazliddin Sagdullayev Rossiya ko‘mir sanoati vakillari bilan uchrashuv o‘tkazdi.

Unda asosiy e’tibor “O‘zbekko‘mir” aksiyadorlik jamiyati ustav kapitalidagi 45 foiz aksiyasini “Progress Gor Tex” mas’uliyati cheklangan jamiya­tiga uch yil muddatga, ishonchli boshqaruvga berilishi bilan bog‘liq masala muhokamasiga qaratildi. Shuning­dek, mamlakatimizdagi konlarning hozirgi imkoniyatlari, texnik va texnologik jihatlari, sohani yanada rivojlantirish haqida fikr almashildi.

O‘zaro ishonch ruhida o‘tgan uchrashuvda “O‘zbekko‘mir” aksiyadorlik jamiyati bosh­qaruv organlariga 2019 yil 1 iyungacha ishonchli boshqaruvchi tomonidan taqdim etiladigan jamiyat samaradorligini oshirish bo‘yicha biznes-rejani ko‘rib chiqish va tasdiqlash, aksiyadorlik jamiyati boshqaruviga xorijiy mutaxassislarni jalb etish borasida so‘z yuritildi. Biznes-reja parametrlari bajarilgan taqdirda 3 yillik muddatni yana uzaytirishga kelishib olindi.

Delegatsiya rahbari Yelena Drobina hamkorlikni yanada mustahkamlash, O‘zbekis­tonda ko‘mir sanoatini rivojlantirishda manfaatli hamkorlikni yo‘lga qo‘yish va rivojlantirish, o‘zaro tajriba almashish, sohaga yangi texnologiyalarni jalb etish bo‘yicha fikr-mulohazalarini bildirdi.

Rossiyalik mutaxassislar “Angren ko‘mir koni” filialida ham bo‘lishdi. Xorijlik mehmonlarga “O‘zbekko‘mir” aksiyadorlik jamiyatining bugungi faoliyati, hayotga tadbiq etilishi kutilayotgan loyihalar haqida ma’lumotlar berildi. Yer osti va usti qazilma boyliklari, mavjud texnika va texnologiya­lar, geologik joylashuv, mavjud imkoniyatlar slayd­larda namoyish etildi.

Ma’lumki, 2017 yilning 8 noyabr kuni O‘zbekiston Respublikasi Prezidentining “O‘zbekko‘mir” aksiyadorlik jamiyati va “Sharg‘unko‘mir” aksiyadorlik jamiya­tini “O‘zbekiston temir yo‘llari” aksiyadorlik jamiyati tarkibiga o‘tkazish hamda ko‘mir sanoati korxonalarini moliyaviy sog‘lomlashtirish borasidagi tashkiliy chora-tadbirlar to‘g‘risida”gi qaror qabul qilingan edi. Bundan ko‘zlangan asosiy maqsad mamlakatimizda ko‘mir sanoatini rivojlantirish, ko‘mir qazib oluvchi korxonalarning moddiy-texnik bazasini yanada takomillashtirish, moliya­viy qo‘llab-quvvatlash va investorlarni kengrok jalb qilishdir.

Rossiyalik sheriklar bilan hamkorlik aloqalarini mustahkamlash ham ana shu maqsadlarni ro‘yobga chiqarishga xizmat qilishi shubhasiz.

DANG‘ARADA KO‘MIR OMBORXONASI OCHILDI

Davlatimiz rahbarining Farg‘ona viloyatiga tashrifi chog‘ida Dang‘ara tumani aholisining ko‘mir yoqilg‘isiga bo‘lgan ehtiyojini to‘la qondirish maqsadida ushbu hududda ko‘mir omborxonasini tashkil etish borasida ko‘rsatma berilgan edi.

“O‘zbekiston temir yo‘llari” aksiyadorlik jamiyatiga yuklatilgan ushbu vazifa qisqa fursatda bajarilib, tumanda yangi zamonaviy ko‘mir omborxonasi ish boshladi. 1 gektar yer maydoniga ega omborxonada mijozlar va ishchi-xodimlar uchun barcha qulayliklar yaratilgan. Iste’molchilar uchun alohida kutish zali, ishchi-xodimlar uchun esa yuvinish, dam olish va ovqatlanish xonalari mavjud.

Loyiha doirasida 350 metr masofada temir yo‘l shoxobchasi qurildi. Briket ishlab chiqarish texnologiyasi o‘rnatildi. Mazkur texnologiya 1 sutkada 150 tonna briket ishlab chiqarish imkoniyatiga ega. Ko‘mir ortib berish uchun yangi texnikalar xarid qilindi. 15 ta yangi ish o‘rni tashkil etildi.

Dang‘ara tumanida 170 ming aholi istiqomat qiladi. Tumanning ko‘mirga bo‘lgan yillik rejasi 11 ming 863 tonnani tashkil etadi. Shundan 8 ming 892 tonnasi aholi, 2 ming 971 tonnasi esa ijtimoiy soha ob’ektlari hisobiga to‘g‘ri keladi. Shu kunga qadar iste’molchilarning mazkur yoqilg‘iga bo‘lgan talabi Qaqir ko‘mir ombori orqali ta’minlab kelingan. Qolaversa, ushbu omborxona tuman markazidan qariyb 40 kilometr uzoqlikda joylashgan bo‘lib, bu ta’minot uchun ortiqcha ovoragarchilik va qi­yinchiliklarni yuzaga keltirayotgan edi.

“O‘zbekiston temir yo‘llari” aksiyadorlik jamiyati Qo‘qon birlashgan yonilg‘i ombor xo‘jaligi tomonidan Dang‘ara tumani va Qo‘qon shahri chegarasida aholiga pullik xizmat ko‘rsatish savdo shoxobchasi ham ochildi. Bu yerda kichik hajm­dagi qoplarda ko‘mir briketlari qadoqlangan holda savdoga qo‘yilgan.

Farg‘ona viloyati bo‘yicha 10 ta omborxona faoliyat ko‘rsatayotgan bo‘lsa, endi ularning soni yana bittaga ko‘paydi. Hozirgi kunda viloyatning Quva tumanida ham zamonaviy omborxona qurilmoqda. Bu ezgu ishlar aholining kundalik hayotida yuz berishi mumkin bo‘lgan noqulayliklarning oldini olib, turmush farovonligini yanada yaxshilashga xizmat qiladi.