“Ўзбеккўмир” акциядорлик жамияти Бош директори Владимир Владимирович Кузнецовнинг байрам табриги

Ҳурматли ҳамкасблар, азиз кончилар!

Сизларни мусулмонларнинг асосий байрами – Қурбон ҳайити билан чин дилдан муборакбод этаман!

Ҳар бир мусулмон учун аҳамиятли бўлган ушбу диний байрам тинчлик ва яхшилик, кечиримлилик ва бошқаларга ғамхўрликни англатади. Адолат ва раҳм-шафқатни талаб қиладиган Ислом асослари одамларни умуминсоний қадриятларга ҳурмат билан муносабатда бўлишга чорлайди.

Сиз кўп асрлик анъаналарни қўллаб-қувватлаш орқали мамлакатнинг маънавий ва маданий хилма-хиллигини сақлашга ҳисса қўшасиз, жамиятда ўзаро тушуниш, бағрикенглик ва миллатлараро тотувликни тарғиб қиласиз.

Ҳурматли ҳамкасблар, мен бутун дунёда ва умуман бутун мамлакат бўйлаб эпидемиологик вазиятга қарамай, «Ўзбеккўмир» АЖ тақдири ва равнақи йўлидаги жасорат ва садоқатингизни алоҳида таъкидламоқчиман.

Ушбу байрам ҳар бир оилага илиқлик, ёрқин умидлар олиб кирсин, эртанги кунга ишончни мустаҳкамласин. Сиҳат-саломатлик, фаровонлик, тинчлик ва барча хайрли ишларингизда муваффақиятлар!

Яна бир бор Қурбон ҳайити муносабати билан чин қалбимдан табриклайман, Сизга ва яқинларингизга сиҳат-саломатлик, бахт ва омад тилайман!

Ҳурмат билан,
В.В.Кузнецов,
“Ўзбеккўмир” АЖ Бош директори

Ибодатнинг энг улуғи – саҳоват

“Ўзбеккўмир” акциядорлик жамияти Бирлашган касаба уюшма қўмитаси Курбон ҳайити олдидан хайрия тадбирлари ўтказмоқда. Шу кунларда боқувчисини йўқотган, ногиронлиги мавжуд ҳамда кам таъминланган кончи оилалари йўқланиб, уларга кундалик зарур озиқ-овқат тўпламлари берилмоқда.

Бирлашган касаба уюшма қўмитаси бундан сал аввал карантин шароитида уйда қолаётган кам таъминланган 60 кончи оиласига ҳудди шундай саҳоват кўрсатган эди.

Эслатиб ўтамиз, Ўзбекистон Республикаси Президентининг қарорига кўра, мамлакатимизда Қурбон ҳайитининг биринчи куни 31 июль – жума куни байрам сифатида кенг нишонланади. Маҳаллий ҳокимликлар ва тегишли ташкилотлар Қурбон ҳайитининг карантин талабларига риоя қилган ҳолда, халқимизнинг миллий ва диний анъаналарига мос равишда ўтиши учун тегишли чора-тадбирларни амалга оширади.

«Ангрен» кўмир конида ёқилғи қазиб олиш кўпаймоқда

Сўнгги ойларда Республикамизда қаттиқ ёқилғини очиқ усулда қазиб олувчи йирик кон иншооти − «Ангрен» кўмир конида қазиш ва истеъмолчиларга етказиб бериш ҳажмлари кескин тушиб кетган эди. Ҳозирги кунда эса аҳвол ўзгарган. Қазиб олиш ва етказиб бериш ҳажмлари кун сайин ортиб бормоқда.

“Ўзбеккўмир” АЖ «Ангрен кўмир кони» филиали бошлиғи вазифасини бажариб турган бош муҳандис Абдурашид Рисқулов шундай дейди:

− Март ойида бошланган карантин тадбирлари ишлаб чиқариш жараёнларига таъсир кўрсатмоқда. Карантин оқибатида кон техникаларига бутловчи ва эҳтиёт қисмлар таъминотида ҳам тақчиллик кузатилди. Ҳозирги кунда аҳвол ижобий томонга ўзгариб бормоқда, − дейди А.Рисқулов.

Конда бир ҳафта аввал иккинчи янги забой ишга туширилди. Ваҳоланки, шу пайтгача атиги битта забойдан кўмир қазиб олинаётган эди. Бош муҳандиснинг қайд этишича, ҳадемай 3-забой фойдаланишга топширилади. Йил охиригача эса яна 4- ва 5-забойлар тайёр бўлиб, улардан ҳам кўмир қазиб олина бошлайди. Кончилар ана шу эзгу ишлар ҳаракатида. Бу каби тадбирлар эса ёқилғи қазиб олиш ҳажмларини ошириш ва бу борадаги режа-топшириқларни бажариш имконини беради.

Айни кунларда акциядорлик жамияти томонидан аҳоли ва бюджет ташкилотларига кўмир бериш бошлаб юборилган.

Маълумот учун, «Ўзбеккўмир» АЖ тасарруфидаги конлардан йил бошидан буён 1 млн. 500 минг тоннадан кўпроқ ёқилғи қазиб олинди. Асосий истеъмолчи бўлган электр станцияларига етказиб берилган кўмир маҳсулоти ҳажми эса 1 млн. 500 минг тоннадан кўпроқни ташкил этмоқда.

Жамоа шартномаси қандай бажарилди?

“Ўзбеккўмир” АЖ Бирлашган касаба уюшма қўмитасининг ҳисобот-сайлов конференцияси бўлиб ўтди. Конференцияда Бирлашган касаба уюшма қўмитаси раиси Абдуносир Қаюмов ҳисобот даврида амалга оширилган ишлар тўғрисида маърузаси тингланди.

Хостинг картинок yapx.ru

Бирлашган касаба уюшмаси қўмитаси ҳамда тизимдаги филиаллар касаба қўмиталари ишчи-ходимларни ижтимоий ва ҳуқуқий ҳимоялаш, хавфсиз меҳнат шароитларини яратиш, ишчи-ходимлар ва оила аъзоларини дам олишларини ташкиллаштириш, соғликларини тиклаш ва турли моддий ёрдамлар кўрсатиш вазфаларини изчил амалга ошириб келмоқда, деди жумладан нотиқ.

Жумладан, 2018 йил давомида жами 100 нафар, 2019 йил давомида эса 130 нафардан ортиқ ишчи-ходим санаторийяларга берилган йўлланмалар билан ўз соғликларини тикладилар.

“Ўзбеккўмир” АЖ қарамоғидаги 310 ўринга мўлжалланган “Коинот” болаларни соғломлаштириш оргоҳида ўтган йил ёз мавсумида 938 нафар (шулардан 93 нафари имтиёзли) болалар соғломлаштирилди. Ҳар йили тизимдаги ишчи-ходимларнинг фарзандларига Янги йил совғаларини берилиб, арча байрамларини ўтказиш анъанага айланган.

Бирлашган касаба уюшмаси қўмитаси томонидан соғлом турмуш тарзини шакллантиришга ҳам катта эътибор берилмоқда. Шу мақсадда филиаллар ўртасида спортнинг волейбол, минифутбол, шахмат-шашка, теннис турлари бўйича спартакиадалар мунтазам ўтказилди. “Ўзбеккўмир”АЖнинг футбол бўйича терма командаси биринчи ўринни, жамиятнинг волейболчи аёллари эса Бош Вазир кубоги учун ўтказилган мусобақада ҳам биринчи ўринни эгалладилар.

Жамоа шартномасида тизимда меҳнат қилаётган хотин-қизларга алоҳида бўлим қабул қилинган бўлиб, уни бажарилиши амалга оширилмоқда. Жумладан, ёш болали аёлларга 1 соат иш вақти қисқартирилган ҳолатда ишлаш, қўл меҳнатига жалб қилмаслик, 12 ёшгача бўлган 3 ва ундан ортиқ нафар (16 ёшгача ногирон боласи) фарзанди бор аёлларга моддий ёрдамлар кўрсатиб келинмоқда.

Пандемия муносабати билан киритилган карантин даврида аҳолининг муҳтож қатламларига 300 тўпламдан ортиқ озиқ-овқатлар тарқатилди. “Саҳоват ва кўмак” умумҳалқ харакати доирасидаги тадбирлар учун “Ўзбеккўмир” АЖ маъмурияти ва Бирлашган касаба уюшмаси қўмитаси томонидан шаҳар учун 100 та озиқ-овқатлар тўпламлари ажратилди.

Умуман олганда, “Ўзбеккўмир” акциядорлик жамиятининг раҳбарияти ва Бирлашган касаба уюшмаси қўмитаси томонидан ишчи-ходимларни ижтимоий ҳақ-ҳуқуқларини ҳимоялаш бўйича жамоа шартномасида белгиланган тадбирлар бажарилмоқда.

Ҳисбот юзасидан музокараларда “Энергия ва коммуникация тармоқлари” филиали раҳбари Э.Эргашев, “Қурилиш монтаж бошқармаси” филиали раҳбари А.Маннапов, “Ангрен кўмир кони” филиали раҳбари в.б. А.Рискулов, “АТТ” филиали экспедитори И.Пардаев, “Ангрен кўмир кони филиали экскаватор машинисти А.Рустамкулов ва бошқалар сўзга чиқдилар.

Бирлашган касаба уюшма қўмитасининг ҳисбот давридаги фаолияти “қониқарли” – деб, топилди.

Конференцияда Бирлашган касаба уюшма қўмитаси тафтиш комиссияси аъзоси Лола Муминованинг ҳисоботи ҳам тингланди ва тегишли қарор қабул қилинди.

Касаба уюшма қўмитасининг 19 кишидан иборат янги таркиби, шунингдек, кўмитанинг юқори органи коференциясига делегатлар сайланди.

Абдуносир Қаюмов Бирлашган касаба уюшма қўмитасининг раиси этиб қайта тасдиқланди.

Конференцияда “Ўзбеккўмир” АЖ Бош директори В.В.Кузнецов, Ўзбекистон энергетика ходимлари касаба уюшмаси Республика Кенгаши раиси в.б. С.Тухтаев иштирок этди ва сўзга чиқди.

Хостинг картинок yapx.ru

“Ўзбеккўмир” АЖ Ахборот хизмати

АППАРТАК КЎМИРИ: ТАДБИРКОР УЧУН МОС СИФАТ

“Ўзбеккўмир” акциядорлик жамияти таркибидаги конлардан қазиб олинаётган кўмир маҳсулотини биржа орқали сотиш ҳажмлари тобора ортиб бормоқда. Биргина «Аппартак» конидан жорий йил июнь ойининг биринчи ярмида 18 минг тонна кўмир биржа савдолари учун етказиб берилди. Ушбу конда йил охиригача 70 000 тонна кўмирни биржага чиқариш кўзда тутилмоқда.

Хостинг картинок yapx.ru

Кўмир маҳсулоти илгари ҳам биржа савдоларига чиқарилган. Аммо бу ишга негадир иккинчи даражали иш деб қаралган. Чунки асосий истеъмолчи электр станциялари ҳисоблаб келинган. Бинобарин, “Ўзбеккўмир” ҳам, унинг асосий истеъмолчиси бўлган Ангрен ва Янги-Ангрен исссиқлик электр станциялари ҳам ҳозирча монопол ташкилот. Демак, маҳсулот станциялардан ортсагина, бошқаларга бериларди.

Эътиборлиси, бугунги кунда вазият бирмунча ўзгарган. Ангрен кончилари минг машаққатлар эвазига қазиб олаётган, “қора олтин”га тенглаштирилган маҳсулотни биржа орқали эмин-эркин сотиш, шунга яраша даромадини кўриш имкониятига эга бўлмоқда.

− Биржа орқали кўмир етказиб беришни бу йил асосан май ойдан бошладик. Талабгорлар эса кўп. Маҳсулотимизни цемент ва ғишт заводлари, иссиқхоналардан сотиб олиш учун ўнлаб тадбиркорлар навбатда туришибди. БР маркали маҳсулотимизнинг ҳар вагони дастлаб 18 миллиондан сотилган бўлса, бугунги кунда унинг нархи 40 миллион сўмгача кўтарилди. Биз кўмирга бўлган бундай юқори талабни қондириш учун, ёқилғи қазиб олиш ва унинг сифатини яхшилаш чораларини кўраяпмиз, − дейди “Ўзбеккўмир” АЖ “Аппартак кўмир кони” филиали бошлиғи Эркин Валиевич Жўраев.

Хостинг картинок yapx.ru

Суҳбатдошимизнинг асли касби – геолог. Тоғ-кон соҳасини чуқур биладиган етук мутахассис. Кўмир конига раҳбар этиб тайинланганига эса кўп бўлгани йўқ.

У ишни нимадан бошлади?

Албатта сифатдан. Гап шундаки, истеъмолчилар ўртасида Аппартак кўмири ҳақида нотўғри тушунча юради, яхши ёнмайди, тутайди, иссиқлик коллорияси кам дегандай… Эркин Валиевич бу фикрларга умуман қўшилмайди. Кўмир ҳар қанча қора бўлмасин, сифати унинг рангига эмас, кулчанлигига боғлиқ. Ангрен электр станциялари кулчанлиги 40 фоизгача кўмирни ёқишга ихтисослаштирилган. Аммо аҳоли, бюджет ташклтлари ва тадбиркорларга “40 фоизгача” мутлақо тўғри келмайди. Шу боисдан кон жамоаси биржа савдолари учун етказиб бериладиган кўмирнинг кулчанлик даражасини максимал туширишга алоҳида эътибор қаратишмоқда.

− Ҳозирги кунда энг сифатли қатламга етиб келганмиз ва ҳақиқий кўмир қазиб олаяпмиз, − сўзида давом этади Э.Жўраев, − Ишонасизми, кулчанлиги атиги тўққиз фоиз! Бунақаси кон тарихида бўлмаган. Хуллас, ҳақиқий кўмир!.. Шундан бўлса керак, маҳсулотимиз биржа савдоларида талаш. Бундан мамнунмиз.

Яқинда конда саралаш мажмуаси қурилиши ниҳоясига етказилди. Бунда Тоғ-кон ускуналарини созлаш заводи мутахассислари кўмаги катта бўлди. Ҳозирда суткасига беш вагонга етказиб сараланган кўмир юкланмоқда. Бу энг олий сифатли ёқилғи бўлиб, тадбиркорлар учун, аҳоли ва бюджет ташкилотлари учун айни муддао.

Ўзбекистонда кўмир икки жой – Сурхондарё (тошкўмир) ва Тошкент вилоятларида (қўнғир кўмир) қазиб олинади. Тошкент вилоятидаги “Аппартак” кони Ангрен кўмир ҳавзаси таркибига кирган бўлиб, фойдали қазилма ер юзасига яқин жойлашгани ва нисбатан юмшоқлиги билан ажралиб туради. Умумий заҳираси – 231 минг тоннадан кўпроқ.

Бугунги кунда ушбу конда янги, «Аппартак − 3» истиқболли участкаси лойиҳаси устида иш олиб борилмоқда.Ушбу лойиҳа амалиётга татбиқ этилса, қўшимча 50 млн. тонна кўмир қазиб олиш имконияти юзага келади.

Албатта, бу яқин келажак ишлари. Бунинг учун инвестиция сув билан ҳаводай зарур бўлади. Зеро, кончилик машаққатли ва шарафли иш.

Неъмат Душаев,
“Ўзбеккўмир” АЖ Ахборот хизмати раҳбари