"O‘zbekko‘mir" aksiyadorlik jamiyati ijro apparati va barcha korxonalarida 2023 yilning 1 yanvaridan boshlab ish yuritish hujjatlari va boshqa hujjatlarni lotin yozuviga asoslangan o‘zbek alifbosida ishlab chiqish, qabul qilish va e’lon qilish amaliyoti to‘liq joriy etiladi.

Bu haqida bugun, 20 sentyabr kuni aksiyadorlik jamiyati ijro apparatida Birlashgan kasaba uyushma qo‘mitasi raisi A.Qayumov raisligida o‘tkazilgan yig‘ilishda ma’lum qilindi.

Jamiyat bosh direktorining birinchi o‘rinbosari A.Mirahmedov, Angren shahar hokimi maslahatchisi N.Nazarova, shahar ma’naviyat va ma’rifat bo‘limi rahbarining o‘rinbosari Y.Jo‘rayev hamda jamiyatning filiallardagi kasaba uyushma qo‘mitalari raislari ishtirokida tashkil etilgan tadbirda davlat miqyosidagi ushbu muhim tadbirning mazmun-mohiyati va ahamiyati, ish yuritishni lotin alifbosiga ko‘rish bilan bog‘liq dolzarb vazifalar atroflicha muhokama etildi.

Vazirlar Mahkamasining 2021 yil 10 fevralda qabul qilingan "Lotin yozuviga asoslangan o‘zbek alifbosiga bosqichma-bosqich to‘liq o‘tishni ta’minlash chora-tadbirlari to‘g‘risida"gi 61-sonli qarori asosida Angren shahrida amalga oshirilayotgan ishlar xususida shahar hokimining maslahatchisi N.Nazarova axborot berdi. Ayni kunlarda shaharda mulkchilik shaklidan qat’iy nazar barcha korxona va tashkilotlarda ish yuritish hujjatlari va boshqa hujjatlarni lotin yozuviga asoslangan o‘zbek alifbosida ishlab chiqish, qabul qilish va e’lon qilish amaliyotiga o‘tilmoqda. Bu borada Angren shahridagi nufuzli korxona - "O‘zbekko‘mir" aksiyadorlik jamiyati namuna bo‘la oladi, dedi jumladan N.Nazarova.

21 oktyabr - O‘zbek tiliga davlat tili maqomi berilgan kuniga bag‘ishlab Angren shahrida "Eng yaxshi ma’naviyat xonasi" ko‘rik-tanlovi o‘tkaziladi va g‘oliblar munosib rag‘batlantiriladi.

Yig‘ilishda jamiyat ijro apparati va korxonalarida ish yuritish hujjatlarini lotin yozuviga to‘liq o‘tkazishni jadallashtirish, ko‘rgazmali targ‘ibot vositalarini shunga mos ravishda qayta o‘rnatish, ma’naviyat xonalarini qayta jihozlash yuzasidan vazifalar belgilanib, moliyaviy jihatdan hal etilishi lozim bo‘lgan masalalar oydinlashtirib olindi.

Ish yuritish hujjatlarini lotin alifbosida olib borish rahbar-mutaxassislardan muayyan bilim va ko‘nikmalarni talab qilishi e’tiborga olinib kadrlarni o‘qitish, ularning malakasini oshirish masalasiga ham e’tibor qaratildi.

Yig‘ilishda bosh direktorning birinchi o‘rinbosari A.Mirahmedov so‘zga chiqdi.

"O‘zbekko‘mir" AJ Axborot xizmati