9-dekabr – Xalqaro korrupsiyaga qarshi kurashish kuni. Shu munosabat bilan “O‘zbekko‘mir” aksiyadorlik jamiyati tarkibiy tuzilmalarida e’lon qilingan “Korrupsiyaga qarshi kurashish oyligi” doirasida “Korrupsiya – jamiyat taraqqiyoti kushandasi” mavzusida tadbir tashkil etilmoqda.

Oylik doirasidagi dastlabki targ‘ibot tadbiri 4-dekabr kuni “Qurilish-montaj ishlari”, “Kapital qurilish” va “Geologiya-qidiruv ekspeditsiyasi” filiallari xodimlari ishtirokida tashkil etildi.

Bugungi kunda yurtimizda korrupsiyaga qarshi kurashish davlat siyosatining eng ustuvor yo‘nalishiga aylangan. So‘nggi yillarda qabul qilinayotgan normativ-huquqiy hujjatlar, korrupsiyaning oldini olishga qaratilgan ma’muriy islohotlar bunga yaqqol misol bo‘la oladi.

“O‘zbekko‘mir” aksiyadorlik jamiyati korrupsiyaga qarshi kurashish bo‘limi boshlig‘i Erkin Amanov olib borgan targ‘ibot tadbirida yurtimizda, shu jumladan, aksiyadorlik jamiyatida ushbu xavfning oldini olish choralarini ko‘rish, illatni keltirib chiqarishi mumkin bo‘lgan sabab va shart-sharoitlarni aniqlash hamda bartaraf etish, korrupsiyaga qarshi murosasiz muhitni shakllantirish borasida amalga oshirilayotgan ishlar xususida so‘z yuritildi.

Ayni paytda korrupsiyaga qarshi immunitetni kuchaytirish, ushbu illatga doir holatlarga duch kelinganida tegishli joylarga darhol xabar qilish, korupsiyaviy holatlarga aralashib qolmaslik, manfaatlar to‘qnashuvining oldini olish  yuzasidan fikr-mulohazalar  bildirildi.

Xuddi shunday tadbir “Tog‘-kon uskunalarini ta’miolash zavodi” filialida ham tashkil etilmoqda.