Ayni kunlarda "Koʻmir taʼminot" MCHJda respublika byudjet tashkilotlarini mahalliy koʻmir bilan taʼminlash tadbirlari uyushqoqlik bilan olib borilmoqda.

Surxondaryo viloyati boʻyicha 2023/2024 yillar kuz-qish mavsumi uchun byudjet tashkilotlari tasdiqlangan reja boʻyicha 36 ming tonna mahalliy koʻmir bilan taʼminlanadi. "Koʻmir taʼminot" MCHJ Surxondaryo viloyati filiali rahbari Xumoyddin Poʻlatovdan olingan maʼlumotlarga koʻra, maktabgacha va maktab taʼlimi, sogʻliqni saqlash, madaniyat va turizm tizimi hamda kollejlar boshqarmasi tasarrufidagi muassasalarga har kuni  800 tonnadan 1200 tonnagacha qattiq yoqilgʻi tarqatilmoqda. Mavsum boshidan buyon ularga yetkazib berilgan koʻmir hajmi 30 ming tonnadan ortib ketdi. 

Ayni paytda viloyatdagi mavjud 12 hududiy koʻmir omborida 600 tonna zaxira bor.  "Oʻzbekkoʻmir" AJ tomonidan ortib yuborilgan 2 ming tonna koʻmir esa hademay viloyatga kirib boradi.

Maʼlumot uchun, tezkor maʼlumotlarga koʻra, "Oʻzbekkoʻmir" AJ tomonidan 1-4 iyun kunlari 32, 6 ming tn koʻmir qazib olindi, isteʼmolchilarga ortib yuborilgan mahsulot 57,5 ming tonnani tashkil etdi. Shundan 13,1 ming tonnasi respublika byudjet tashkilotlari ehtiyojlari uchun moʻljallangan.