− Биз истеъмолчиларга ҳамиша сифатли кўмир етказиб бериш ҳаракатидамиз. Япониянинг ушбу Hitachi EX-1200 экскаватори конимизга айнан шу мақсадда келтирилди. Уни менга ишониб топширилаётганидан мамнунман, − дейди тажрибали экскаватор машинисти, “Меҳнат шуҳрати” ордени соҳиби Абдусоли Рустамқулов.

Кондан сара кўмир қазиб олиш осон эмас. Кўмир қатламлари чўкинди жинслар остида анча чуқурликда ётади. Улар кўпинча қумтош, оҳактош ва тоғ жинслари билан аралаш келади. Hitachi EX-1200 эса кўмирни ана шу тоғ жинсларидан осонгина ажратиб олади. У одатдаги экскаваторлар бажара олмайдиган нозик ишларни бажаради.
Абдусоли Рустамқуловнинг таъкидлашича, Hitachi EX-1200− ноёб техника. Нарҳи ҳам шунга яраша − қиммат.  Бир сўз билан айтганда, "Ангрен" кўмир конида истеъмолчиларга сара кўмир етказиб бериш борасида янги босқич бошланмоқда.
Эътиборлиси, моҳир экскаватор машинисти ва унинг биргадаси 7 кубометрли ушбу техникани йиғишни бир ҳафта мобайнида муваффақиятли тугатишди.

Оқ йўл, Hitachi!