2022 yil nihoyasiga yetmoqda. "Oʻzbekkoʻmir" aksiyadorlik jamiyati uchun yil ancha murakkab, ammo barakali keldi. Muhimi, konchilarimiz yangi yilni munosib mehnat sovgʻalari bilan kutib olmoqdalar. 

Erishilgan yutuqlarda jamiyat filiallarida mehnat qilayotgan tibbiyot xodimlari, mehnatni muhofaza qilish va xavfsizlik texnikasi muhandislari, oʻquv markazi murabbiylarining ham hissasi katta boʻlmoqda. Yangi yil arafasida ularning fidokorona mehnati uchun minnatdorlik bildirib, rahmat deb qoʻyish ularni yangi zafarlar sari ilhomlantirishi shubhasiz. Buni yaxshi anglagan jamiyat mehnat muhofazasi, texnika, sanoat xavfsizligi va ekologiya boʻlimi boshligʻi Shukurjon Haitmatov yaxshi tashabbus bilan chiqdi va ularning tashkilotchiligida bayram tadbiri tashkil etildi. 

Tadbirda Jamiyat Birlashgan kasaba uyushma qoʻmitasi raisi Abdunosir Qayumov va Sanoat xavfsizligi davlat qoʻmitasining Angren kon-texnika inspeksiyasi boshligʻi Umarali Irkabayevlarning ishtiroki davraga alohida fayz bagʻishladi. Mehmonlar yigʻilganlarni ishlab chiqarishdagi yuksak yutuqlari va kirib kelayotgan yangi – 2023-yil bilan chin yurakdan tabrikladilar va ularga mustahkam sogʻlik, farovonlik, yanada ulkan mehnat yutuqlari tiladilar. 

Tadbir ishtirokchilariga yangi yil sovgʻalari topshirildi. Angren shahar madaniyat boʻlimi qoshidagi "Shans" guruhi tomonidan namoyish qilingan bayram dasturi barchaga koʻtarinki kayfiyat bagʻishladi.