Bugun, 14-mart kuni “O‘zbekko‘mir” aksiyadorlik jamiyati tasarrufidagi “Temir yo‘l transporti” filialida “Tabiiy va texnogen xususiyatli favqulodda vaziyatlar yuzaga kelganda ob’ekt rahbariyati va fuqaro muhofazasi tuzilmalarining harakatlari” mavzusida maxsus-taktik o‘quv mashqi o‘tkazildi.

Kun sovuq bo‘lishiga qaramay, belgilangan manzilda filial fuqaro muhofazasi hamda 2-Alohida harbiylashtirilgan kon-qutqaruv vzvodi shaxsiy tarkiblari jam bo‘ldi.

Uch bosqichda o‘tkazilgan mashg‘ulotda konchi-temiryo‘lchilar favqulodda vaziyatlarda harakatlanish bo‘yicha bilim va ko‘nikmalarini navbatdagi sinovdan o‘tkazdilar.

– Havo sovuq, qor uchqunlab turardi. Ammo bu ishtirokchilarga kor qilmadi. Zero, bunday paytda ob-havoning qandayligi bizda rol o‘ynamaydi. Axir qutqaruvchilar, ular xoh ko‘ngilli, xoh professional bo‘lsin, favqulodda vaziyatlarda qor-yomg‘irga qarab ish tutmaydi. Aksincha, qor yoqqani mashg‘ulotning saviyasini yanada oshirdi, – filial FM va FV bo‘yicha muhandis Xojiakbar Jumaboev.