Ijtimoiy tarmoqda "Fargʻona viloyati Sӯx tumani "Qizilqiyoq" mahallasida joylashgan "Baxti Saidi Sӯxi" xususiy korxonasi rahbari Yunusjon  Karimjonov qariyb ikki yildan buyon faoliyatini boshlolmay sarson" jumlalari bilan boshlangan tanqidiy post eʼlon qilindi.


Unda jumladan, "Baxti Saidi Sӯxi" xususiy korxonasida briket ishlab chiqarishni yoʻlga qoʻyilgani, ammo arzon xomashyo yoʻqligi uchun ish toʻxtab qolgani, "Oʻzbekkoʻmir" AJ tomonidan ushbu xomashyo imtiyozli narxlarda berilmayotgani bayon qilingan.

"Oʻzbekkoʻmir" AJ Axborot xizmati  ushbu chiqish yuzasidan quyidagilarni maʼlum qiladi: 

Jamiyat tomonidan qazib olinayotgan koʻmir mahsuloti Vazirlar Mahkamasi tomonidan tasdiqlangan balans asosida, issiqlik elektr stansiyalariga, byudjet tashkilotlari va aholi isteʼmolchilari ehtiyojlari uchun yetkazib beriladi, shuningdek, muayyan mahsulot birja savdolariga chiqariladi.

Yuqoridagilardan kelib chiqib, tadbirkorlar,  shu jumladan, "Baxti Saidi Sӯxi"xususiy korxonasi ishlab chiqarish uchun zarur boʻlgan mahalliy koʻmir mahsulotini faqat birja savdolari orqali sotib olishi mumkinligini maʼlum qilamiz.
 

"Oʻzbekkoʻmir" AJ Axborot xizmati