"Ўзбеккўмир" АЖ Бирлашган касаба уюшмаси қўмитаси ҳамда филиаллар касаба қўмиталари Жамоа шартномаси талаблари асосида тизимдаги ишчи-ходимларни ижтимоий ва ҳуқуқий ҳимоялаш, хавфсиз меҳнат шароитларини яратиш, ишчи-ходимлар ва оила аъзоларининг дам олишларини ташкиллаштириш, соғликларини тиклаш ва турли моддий ёрдамлар кўрсатиш вазфаларини изчил амалга ошириб келмоқда.

Хусусан, 2021 йилнинг 1-ярим йиллиги мобайнида 61 нафар ишчи-ходим турли санаторияларда саломатлигини тиклаб қайтди, бунинг учун 141 721 000 сўм сарфланди. Касб касаллигини орттирган 2 нафар кишига йўлланмалар имтиёзли (бепул) берилди. Моддий ва маънавий томондан қўллаб-қувватлаш мақсадида 108 нафар ишчи-ходимга 174 928 000 сўмлик турли хилдаги моддий ёрдамлар кўрсатилди ва бу ишлар бугунги кунда давом эттирилмоқда.  

“Коинот” болаларни соғломлаштириш оромгоҳида жорий йил ёзги мавсум даврида 750 нафар ўғил-қиз соғломлаштирилди.

Жамиятда аёллар меҳнатига алоҳида эътибор қаратилган. Ҳеч бир аёл оғир қўл меҳнати билан бажариладиган ишга жалб қилинмаган. Аёллар учун филиалларда шахсий гигиена хоналари ташкил қилинган, 2 ва ундан ортиқ вояга етмаган фарзанди бор аёлларнинг меҳнат таътилига қўшимча 3 кундан таътил бериш ҳам жамоа шартномасида кўзда тутилган ва амалга оширилмоқда, 2 ёшга тўлмаган болалари бор аёлларга 1 соат кам иш куни белгиланган.  3 нафар ва ундан кўп болалари бўлган аёлларга белгиланган тартибда моддий ёрдамлар кўрсатиб борилди.

27 июль куни “Ўзбеккўмир” АЖ Билашган касаба уюшма қўмитасининг қўмита раиси Абдуносир Қаюмов раислигида “Жамоа шартномаси” бажарилишининг 2021 йил 1-ярим йилликдаги ижроси масаласига бағишлаб ўтказилган йиғилишида ана шу ютуқлар эътироф этилди. Айни пайтда йўл қўйилган камчилик ва муаммолар атрофлича муҳокама этилиб, келгуси вазифалар белгилаб олинди.  

Йиғилишда “Ўзбеккўмир” АЖ Бош директорининг биринчи ўринбосари Алижон Мираҳмедов иштирок этди ва сўзга чиқди.