22-sentabr ‒ xalqaro avtomobilsiz kun sifatida nishonlandi. Mazkur kun  tadbirlarida “O‘zbekko‘mir” aksiyadorlik jamiyati xodimlari ham qatnashdi.

Quvonchlisi, jamiyat tizimidagi korxonalarda “Avtomobilsiz kun” tadbirlarida ishtirok etuvchilar soni yildan-yilga ko‘payib bormoqda. Yosh mutaxassis Hasanboy Qosimov shulardan biri.

‒ Xalqaro avtomobilsiz kun bu gal yakshanba kuniga to‘g‘ri keldi. Dam olish kunlari esa mashinadan foydalanishga zarurat ortadi. Shunga qaramay, shu kuni men shaxsiy avtoulovimdan foydalanmadim va jismoniy mashg‘ulotlarda qatnashish va hordiq chiqarish uchun sport maskani hamda  yoshlar bog‘iga piyoda borib keldim. Albatta, buning uchun ko‘proq vaqt ketdi, ko‘proq piyoda yurdim. Bu sog‘lom turmush tarzining muhim shartlaridan birdir. Qolaversa, shunday qilsak, shahrimiz havosining musaffoligiga ozroq bo‘lsa-da hissa qo‘shgan bo‘lamiz, ‒deydi Hasanboy.

Ma’lumot uchun, Bu sana 1995 yildan beri World Car Free Days konsorsiumi tashabbusi bilan dunyoning yuzlab shaharlarida o‘tkazib kelinmoqda.Vazirlar Mahkamasining qarori bilan 2021-yildan boshlab 22-sentabr respublika bo‘yicha “Avtomobilsiz kun” deb e’lon qilingan. Mazkur kunda aholiga shaxsiy avtomobillardan foydalanmaslik, imkon qadar piyoda yurish, jamoat transportlarida yoki velosiped va shunga o‘xshash salomatlik uchun foydali bo‘lgan transport vositalarida harakatlanish tavsiya etilgan. Maqsad mamlakatimiz aholisi o‘rtasida ekologik madaniyat va sog‘lom turmush tarzini targ‘ib qilish, yo‘l harakati xavfsizligini yanada takomillashtirishdan iborat.