"Oʻzbekkoʻmir" aksiyadorlik jamiyatida 8 mart ‒ Xalqaro xotin-qizlar kuniga bagʻishlangan tantanali tadbir va bayram konserti oʻtkazildi.

Goʻzallik va Nafosat timsoli boʻlgan ayol misli bahorga oʻxshaydi. Oʻlkamiz uzra muattar sepini yoya boshlagan koʻklamning ilk kunlari aynan xotin-qizlar bayrami bilan boshlanishi ham bejiz emas. Ayoli bor oila ham, jamiyat ham qut-barakali, fayzli va tarovatlidir. 

Davlatchiligimiz, azaliy urf-odatlarimiz va tariximizda ayollarga ehtirom ruhi saqlanib, hozirgi kunda ham bu anʼana izchil davom ettirilmoqda. Oʻzbekkoʻmir" aksiyadorlik jamiyatida faoliyat koʻrsatayotgan ming nafardan ziyod xotin-qizlar ham hamisha eʼzozda. Jamoa shartnomasida ham bu haqida alohida bandlar boʻlib, ularning huquq va manfaatlari belgilab qoʻyilgan.
Birlashgan kasaba uyushma qoʻmitasi raisi Abdunosir Qayumov tantanali tadbirni tabrik soʻzi bilan ochar ekan, bu haqida alohida mamnuniyat bilan toʻxtalib oʻtdi.

"Temir yoʻl transporti" filiali rahbari Yernat Kokenov va boshqalar ham tadbirda soʻz olib, jamiyat xotin-qizlarini muborakbod etdilar.

Bayram munosabati bilan "Oʻzbekkoʻmir" AJ va Birlashgan kasaba uyushmasi jamiyat tizimida mehnat qilib kelayotgan ayollarning 100 nafariga esdalik sovgʻasi ajratgan edi. Tadbirda ana shu sovgʻalar va gullar oʻz egalariga tantanali ravishda topshirildi.

Taniqli aktyor Sanjar Shodiyev ishtirokida namoyish qilingan bayram konserti tadbir qatnashchilariga koʻtarinki kayfiyati bagʻishladi.