Бухоро вилоятининг Бухоро, Вобкент, Жондор, Когон, Олот, Пешку, Ромитан, Шофиркон, Қоракўл ва Ғиждувон туманларида ижтимоий ҳимояга муҳтож, «Темир» ва «Аёллар» дафтарига киритилган фуқароларни янада қўллаб-қувватлаш мақсадида бепул кўмир тарқатилмоқда.

«Саховат ва кўмак» жамғармаси маблағлари ҳисобидан вилоят кесимида табиий газ билан таъминланмаган жами 234 та маҳалла фуқаролар йиғини ҳудудидаги 636 та қишлоқда истиқомат қилувчи 3 минг 109 та эҳтиёжманд оилага 622 тонна кўмир етказилиши режалаштирилган.  

Маҳаллаларда ўтказилган ўрганишлар ҳамда мурожаатлардан келиб чиқиб Олот туманининг маҳаллаларида яшовчи 365 та эҳтиёжманд оилага 300 килограммдан кўмир бепул тарқатилди.  

– Совуқ кунлар бошлансада етишмовчилик туфайли кўмир сотиб олишга имкон тополмаётган эдик, – дейди Ўзбекистон маҳалла фуқаролар йиғинида яшовчи Гулнора Авезова. – Қийин бир шароитда бепул кўмир берилгани оиламизни беҳад қувонтирди. Бунинг учун давлатимизга, шу хайрли ишнинг бошида турган барча яхши инсонларга раҳмат. Туманда кўмир захирасини яратиш, аҳолини кўмир ёнилғиси билан таъминлашга қаратилган ишлар белгиланган режа асосида давом этмоқда.  

Зариф Комилов, ЎзА