O‘zbekiston Respublikasi Tog‘-kon sanoati va geologiya vazirligi, Kambag‘allikni qisqartirish va bandlik vazirligi hamda Milliy malaka tizimini rivojlantirish instituti hamkorligida tog‘-kon sanoati, geologiya va mineral resurslar sohalarida kasbiy malakalarni rivojlantirish masalalariga bag‘ishlangan ikki kunlik seminar-trening tashkil etildi.

Geologiya fanlari universitetida bo‘lib o‘tgan tadbirda vazirlik vakillari, sohaviy ilmiy va ta’lim muassasalari hamda tarmoq korxonalarining mutaxassislari, jumladan, “O‘zbekko‘mir” AJ vakillari ishtirok etdi.

Seminar-treningda Milliy malaka tizimini joriy etish, kasb va malaka talablarini zamonaviy ishlab chiqarish jarayonlari ehtiyojlariga moslashtirish, xodimlarni tayyorlash, qayta tayyorlash va malakasini oshirish tizimini takomillashtirish, shuningdek, dual ta’limni rivojlantirish hamda korxonalar va ta’lim muassasalari o‘rtasidagi hamkorlikni mustahkamlash masalalari muhokama qilindi.

Tadbir davomida “O‘zbekko‘mir” AJ Inson resurslarini boshqarish va rivojlantirish boshqarmasi boshlig‘i o‘rinbosari Umarova tomonidan sohada kadrlar salohiyatini rivojlantirish, xodimlarning kasbiy kompetensiyalarini oshirish hamda malaka tizimini takomillashtirish yo‘nalishlari bo‘yicha ma’ruza qilindi.

Shuningdek, jamiyat mutaxassislari seminar doirasidagi muhokamalarda faol ishtirok etib, kasbiy malakalarni rivojlantirish, ishlab chiqarish ehtiyojlariga mos kadrlar tayyorlash va amaliy ta’lim samaradorligini oshirish yuzasidan o‘z taklif va mulohazalarini bildirdilar.

Seminar yakunida tog‘-kon sanoati korxonalari uchun malakali mutaxassislar tayyorlash, xodimlarning kasbiy ko‘nikmalarini rivojlantirish va kadrlar zaxirasini shakllantirish bo‘yicha ustuvor vazifalar belgilab olindi.