Yoshlar kuni munosabati bilan Prezident Shavkat Mirziyoyev mamlakatimizning faol, tashabbuskor va iqtidorli yoshlari bilan uchrashdi. Tadbirda davlatimiz rahbari yoshlarni bayram bilan samimiy tabriklab, ularning mamlakat taraqqiyotidagi o‘rni, amalga oshirilayotgan islohotlar hamda kelgusidagi ustuvor vazifalar haqida atroflicha so‘z yuritdi.

Bu haqida Prezident matbuot kotibi xabar qildi.

Uchrashuv avvalida Prezidentimiz bir guruh faol yoshlarni “Kelajak bunyodkori” medali va “Mard o‘g‘lon” davlat mukofoti bilan tantanali taqdirladi. Shuningdek, turli sohalarda faoliyat yuritayotgan iqtidorli yoshlarning innovatsion loyihalari bilan tanishdi.

Davlatimiz rahbari ta’kidlaganidek, mustaqillik yillarida, ayniqsa keyingi davrda yoshlarni qo‘llab-quvvatlash davlat siyosatining ustuvor yo‘nalishiga aylandi. Har bir mahallada yoshlar yetakchilari tizimi yo‘lga qo‘yildi, “Yoshlar daftari” orqali 1,5 million nafar yoshning muammolari hal etildi, yosh tadbirkorlar soni besh barobar oshib, 287 ming nafardan ziyodga yetdi. Xorijiy tillarni o‘rganayotgan yoshlar soni 3,5 millionni tashkil etdi.

Prezidentimiz bugungi kunda dunyoda raqobat inson kapitali, bilim va texnologiyalar asosida kechayotganini ta’kidlab, yoshlarni Uchinchi Renessans bunyodkorlari bo‘lishga chaqirdi.

“Bugungi kunning muvaffaqiyat formulasi, ertangi taraqqiyotning mustahkam zamini uchta eng muhim ustunga tayanadi. Bu – bilim, kasb va texnologiya,” – dedi davlatimiz rahbari.

Shu munosabat bilan yoshlarni kasb-hunarga o‘qitish va bandligini ta’minlash bo‘yicha qator yangi tashabbuslar ilgari surildi. Jumladan, har yili 500 ming nafar yoshni zamonaviy kasblarga o‘qitadigan “Kelajak bilimlari ekotizimi” joriy etiladi. “Kasb vaucheri” tizimi orqali minglab yoshlarning zamonaviy kasblarni egallash xarajatlari qoplanadi. Xususiy o‘quv markazlari va texnikumlar faoliyatini qo‘llab-quvvatlash bo‘yicha yangi imtiyozlar ham e’lon qilindi.

Uchrashuvda yosh tadbirkorlikni rivojlantirish, startaplarni moliyalashtirish, sun’iy intellekt va axborot texnologiyalari sohasini kengaytirish, “TOP-100” yosh liderlar dasturi, “O‘zbekiston yoshlar ligasi” platformasi, “Yoshlar mini-franshizasi”, “Mening birinchi kompyuterim” loyihasi kabi ko‘plab yangi tashabbuslar taqdim etildi. Bu loyihalar yoshlarning bilim olishi, ish bilan ta’minlanishi, biznes boshlashi va innovatsion g‘oyalarini ro‘yobga chiqarishiga xizmat qiladi.

Prezidentimiz O‘zbekiston milliy futbol terma jamoasining jahon chempionatidagi ishtirokiga ham to‘xtalib, sportchilarni qo‘llab-quvvatlash muhimligini ta’kidladi. Bolalar futbolini rivojlantirish, Osiyo kubogiga puxta tayyorgarlik ko‘rish bo‘yicha topshiriqlar berildi.

Tadbir yakunida davlatimiz rahbari yoshlarni giyohvandlik va boshqa zararli illatlarga qarshi murosasiz bo‘lishga chaqirib, ota-onalarning farzand tarbiyasidagi mas’uliyatiga alohida urg‘u berdi.

– Biz yoshlarimizga yaratib berayotgan imkoniyatlardan biror yigit-qiz chetda qolmasligi kerak, – dedi Prezidentimiz.

Mazkur uchrashuvda ilgari surilgan yangi tashabbus va dasturlar yoshlarning bilim olishi, zamonaviy kasb egallashi, tadbirkorlik, innovatsiya hamda davlat boshqaruvidagi ishtirokini kengaytirishga xizmat qilib, Yangi O‘zbekiston taraqqiyotida yoshlarning o‘rnini yanada mustahkamlashga qaratilgani bilan ahamiyatlidir.

Manba: https://t.me/Press_Secretary_Uz/7543