Маълумки, “Ўзбеккўмир” АЖ томонидан 2021 йил учун белгиланган кўмир етказиб беришнинг барча кўрсаткичлари ортиғи билан муддатидан олдин бажарилди. Хусусан, 2021-2022 йиллар куз-қиш мавсуми учун бюджет ташкилотларига 450 минг тонна, аҳоли истеъмолчилари учун 705 минг тонна маҳаллий кўмир етказиб берилди.

Истеъмолчиларнинг талабларидан келиб чиқиб, 2022 йил январь-февраль ойларида қўшимча равишда 256 038 тонна кўмир маҳсулоти етказиб бериш режалаштирилган.
Айни кунларда, ноқулай об-ҳаво шароитига қарамай, қаттиқ ёқилғи қазиб олиш ва истеъмолчиларга жўнатиш ишлари кечасию кундуз узлуксиз ташкил этилган.
“Ангрен кўмир кони” филиали кўмир йўналиши бошлиғи Суннатилло Маҳкамов маълумот беришича, айни кунларда мазкур кондан кунига 10,5 минг тонна ўрнига ўртача 11-12 минг тоннадан ошириб кўмир қазиб олинмоқда ва тайёр маҳсулотнинг асосий қисми аҳоли ва бюджет истеъмолчиларига қўшимча равишда юклаб жўнатилмоқда.
Тезкор маълумотларга кўра, 20 январь ҳолатига аҳоли эҳтиёжлари учун юборилган кўмир 73,5 минг, бюджет ташкилотларига юборилган кўмир 10,6 минг тонна, жами 84,2 минг тоннадан ортиб кетди. Бу кундалик топшириққа нисбатан 3 минг тоннага кўп демакдир.