Ertalabki badantarbiya, kun davomidagi jismoniy harakat, tushlik vaqti hamda ishdan keyingi sport mashg‘ulotlari sog‘lom hayot tarzining oddiy, ammo samarali odatlaridir. Jismoniy faollik nafaqat salomatlikni mustahkamlaydi, balki kayfiyat va ish unumdorligiga ham ijobiy ta’sir ko‘rsatadi.

“O‘zbekko‘mir” AJda juma kuni ana shunday faollik va sog‘lom turmush tarziga alohida e’tibor qaratiladi. Bu kun xodimlar uchun sport bilan shug‘ullanish, hamkasblar bilan birgalikda vaqt o‘tkazish va ish kunini ko‘tarinki kayfiyatda davom ettirish uchun yaxshi imkoniyatdir.

Bugun ham Jamiyat xodimlari, xususan, ijro apparati jamoasi ish kunini ertalabki badantarbiya mashqlari bilan boshladi. Qisqa muddatli mashg‘ulotlar xodimlarning jismoniy faolligini oshirish bilan birga, kunni tetiklik va yaxshi kayfiyatda boshlashga xizmat qildi.

Tushlik vaqtida esa Jamiyatning sport majmuasida xodimlar o‘rtasida qiziqarli voleybol musobaqasi tashkil etildi. Sport maydonidagi shiddatli bahslar, jamoaviy harakat va do‘stona raqobat ishtirokchilarga ko‘tarinki kayfiyat bag‘ishladi.

Ayniqsa, bugungi sport tadbirlariga Mustaqilligimizning 35 yilligi munosabati bilan yurtimizda hukm surayotgan bayramona kayfiyat hamohang bo‘ldi.