Hozirgi kunlarda havo sovishi sababli ko‘pchilik aholi ko‘mirga ehtiyoj sezmoqda. Tayloq tumani Do‘stlik MFYda istiqomat qiluvchi A. Xomidov mahalliy ko‘mir xarid qilish masalasida “O‘zbekko‘mir” AJga murojaat qilgan edi. Ushbu murojaat “Ko‘mir ta’minot” MChJ Samarqand viloyati filiali tomonidan ko‘rib chiqildi va fuqaro ko‘mir mahsuloti bilan ta’minlandi.

Filial rahbariyati tomonidan yo‘llangan javob xatida ma’lum qilinishicha, joriy 2025–2026-yillar kuz-qish mavsumi uchun Samarqand viloyati aholisini 166,6 ming tonna mahalliy ko‘mir bilan ta’minlash rejalashtirilgan. Jomboy ko‘mir ombori viloyatning Jomboy va Tayloq tumanlari aholisi uchun jami 20 ming tonna ko‘mir yoqilg‘isini yetkazib berishi belgilangan. Hozirgi kunda mahalliy ko‘mir yoqilg‘isi tarqatish ishlari jadal davom etmoqda va Jomboy ko‘mir omborida ko‘mir zaxirasi yetarli.

Yoqilg‘iga ehtiyojmand fuqarolar Mycoal.uz elektron platformasiga kiritilgan ariza orqali “Ko‘mir ta’minot” MChJ tasarrufidagi o‘zlariga yaqin hududiy ko‘mir omboriga murojaat qilib, tegishli ko‘mirni xarid qilishlari mumkin. Omborlarda sun’iy navbatlar yuzaga kelmasligi uchun mahalliy hokimliklar tomonidan tasdiqlangan mahallalar kesimidagi jadvalga qat’iy amal qilish so‘raladi.

“O‘zbekko‘mir” AJ Axborot xizmati