Mamlakatimiz yer osti boyliklariga nihoyatda boy. Keyingi yillarda Prezidentimiz Shavkat Mirziyoyev rahbarligida konchilik va metallurgiya sohasiga qaratilayotgan katta e’tibor, soha xodimlarining fidokorona mehnati va jasorati natijasida ushbu boyliklar xalqimiz farovonligi, yurt taraqqiyoti yo‘lida samarali xizmat qilmoqda.

May oyining uchinchi yakshanbasi mamlakatimizda O‘zbekiston konchilik va metallurgiya sanoati xodimlari kuni sifatida nishonlanishi esa soha vakillariga bildirilgan yuksak e’tirofdir. Shu munosabat bilan yurtimiz bo‘ylab turli bayram tadbirlari va tantanalar o‘tkazilmoqda.

15-may kuni Oʻzbekkoʻmir aksiyadorlik jamiyatida ham kasb bayrami munosabati bilan tantanali tadbir tashkil etildi.

Jamiyatning “Kapital qurilish, montaj ishlari va ijtimoiy soha” filiali faollar zalida bo‘lib o‘tgan tadbirda ilg‘or konchilar, mehnat faxriylari, jamiyat rahbariyati hamda kasaba uyushmasi faollari ishtirok etdi.

Tadbirda Angren shahri hokimi Alisher Rayimov so‘zga chiqib, angrenlik konchilarning sharafli va mashaqqatli mehnatini alohida e’tirof etdi. U Oʻzbekkoʻmir nafaqat shahar, balki respublika miqyosida ham muhim ahamiyatga ega sanoat korxonalaridan biri ekanini ta’kidlab, aholi va iqtisodiyot tarmoqlarini arzon hamda sifatli mahalliy ko‘mir bilan ta’minlashda, shuningdek, yangi ish o‘rinlari yaratish va shahar iqtisodiyotini rivojlantirishda jamiyatning o‘rni beqiyos ekanini qayd etdi. Shu munosabat bilan u konchilar jamoasiga minnatdorlik bildirib, barchani kasb bayrami bilan samimiy tabrikladi.

Shuningdek, tadbirda O‘zbekiston energetika, neft-gaz va geologiya xodimlari kasaba uyushmasi Respublika kengashi raisi o‘rinbosari Saidmurod Toʻxtaev, Oʻzbekkoʻmir bosh muhandisi – ishlab chiqarish bo‘yicha bosh direktor o‘rinbosari Vladimir Kuznetsov, jamiyat bosh direktorining birinchi o‘rinbosari Oybek Ismoilov va boshqalar ham so‘zga chiqib, soha xodimlari va mehnat faxriylarini muborakbod etdilar. Tantanali marosim davomida jamiyat korxonalarida faoliyat ko‘rsatayotgan ilg‘or xodimlar va mehnat faxriylarining katta guruhiga  Angren shahar hokimligi, O‘zbekiston energetika, neft-gaz va geologiya xodimlari kasaba uyushmasi Respublika kengashi hamda Oʻzbekkoʻmir tomonidan faxriy yorliqlar, pul mukofotlari va qimmatbaho esdalik sovg‘alari topshirildi.

Shuningdek, bir guruh ilg‘or konchilar “Konchilik shuhrati” ko‘krak nishoni bilan taqdirlandi.

Tadbir taniqli xonanda Ahror Usmonov ishtirokidagi bayram konserti bilan yakunlanib, ishtirokchilarga ko‘tarinki kayfiyat ulashdi.

“O‘zbekko‘mir” AJ Axborot xizmati