Prezidentimiz Shavkat Mirziyoyev 30 sentyabr kuni “Yangi O‘zbekiston” universitetida ustoz va murabbiylar bilan uchrashuvda korxona ehtiyojidan kelib chiqib mutaxassis tayyorlashga qaratilgan yangi yondashuvlarni belgilab berdi.

Kelasi yildan 75 ta oliy ta’lim muassasasida, 2028 yildan esa barcha oliygohlarda “korxona – oliygoh – maqsadli kadr” tizimi joriy etiladi.

Bunda ish beruvchi o‘ziga zarur mutaxassisni tayyorlash uchun oliygohga buyurtma beradi. Nomzod testsiz, suhbat asosida qabul qilinadi. Talaba o‘qish bilan birga korxonada ishlab, amaliy ko‘nikma egallaydi.

Yangi tizim korxonalar uchun ham qator imkoniyatlarni beradi:

— talabaga to‘langan ish haqining 50 foizi davlat tomonidan qoplanadi;
— korxona murabbiyiga oliygoh pedagoglari oyligiga teng miqdorda qo‘shimcha haq to‘lanadi;
— zarur hollarda talabaning ijara xarajatlari qoplanadi;
— yaxshi natija ko‘rsatgan talabalar ikkinchi kursdan davlat grantiga o‘tishi mumkin;
— dual ta’limni samarali tashkil etgan oliygoh va hamkor korxonalar 1–3 milliard so‘mgacha mukofotlanadi.