«O‘zbekko‘mir» AJda favqulodda vaziyatlarning oldini olish, ular yuzaga kelganda tezkor va samarali harakat qilish, shuningdek, xodimlar, jumladan konchilar xavfsizligini ta’minlash bo‘yicha o‘quv-amaliy mashg‘ulot o‘tkazildi.

Mashg‘ulot O‘zbekiston Respublikasi Vazirlar Mahkamasining 2026 yil 22 iyundagi 26/26-112-sonli ko‘rsatmasi ijrosi doirasida Angren shahar FVB, «O‘zbekko‘mir» AJ O‘FVB hamda tegishli tashkilotlar bilan hamkorlikda tashkil etildi.

Unda elektr energiyasi, tabiiy gaz, suv va issiqlik ta’minotida uzilishlar, shuningdek, zilzila bilan bog‘liq favqulodda vaziyatlar yuzaga kelganda xodimlarning harakatlari, xavfsizlik choralarini ko‘rish va oqibatlarni tezkor bartaraf etish bo‘yicha amaliy tadbirlar bajarildi.

Mashg‘ulotning asosiy maqsadi favqulodda vaziyatlarning oldini olish, xodimlarning, ayniqsa ishlab chiqarish jarayonida bevosita ishtirok etuvchi konchilarning xavfsizligini ta’minlash, mas’ul xodimlarning bunday holatlardagi amaliy ko‘nikmalarini oshirish hamda tegishli xizmatlar o‘rtasidagi hamkorlikni yanada mustahkamlashdan iborat bo‘ldi.

Bunday o‘quv-amaliy mashg‘ulotlar favqulodda vaziyatlarga tayyorgarlik darajasini oshirish, tezkor harakat qilish ko‘nikmalarini mustahkamlash va korxonada xavfsiz mehnat sharoitlarini ta’minlashda muhim ahamiyat kasb etadi.

Mashg‘ulot davomida 62 nafar xodim ishtirok etib, 11 ta maxsus texnika jalb qilindi.