#Filiallar_hayoti

“Shaxta usulida ko‘mir qazib olish” (ShUKQO) filialida yer osti mashina-mexanizmlari va konveyer qurilmalarini yig‘ish hamda  ta’mirlash ishlari asosan yer ustida amalga oshiriladi.  

– Ko‘mir shaxtasida ishlayotgan konchilar tokar, payvandchi, mexanik, elektromontyor kabi mutaxassislar ko‘magiga doimo muhtoj bo‘ladi, – deydi korxona bosh muhandisi Jamol Alimqulov. – Negaki, bitta oddiy murvat ishdan chiqsa ham konveyer tizimlari anchagacha to‘xtab qolishi mumkin. Shu boisdan ham ustalarimiz va ustaxonamiz tunu kun  ishlab chiqarishdagi har qanday nosozliklarni o‘z vaqtida bartaraf etib bormoqdalar.

Yigirma yetti yildan buyon o‘zining sevimli stanogi yonidan ketmagan tokar Rasul Alimjonov kon ehtiyojlari uchun har kuni ehtiyot qismlarga buyurtmalar oladi. Uning assortimentida bir necha o‘nlab turli ehtiyot qismlar va butlovchi qismlar mavjud. Bu qismlarni tashqaridan buyurtma qilishning hojati yo‘q: Rasul aka ularni o‘z qo‘llari bilan yaratadi va buni mukammal qiladi.

Tog‘-kon texnikasini ta’mirlash ustasi G‘afur Eshboev ham mohir mutaxassislardan bo‘lib, u 25 yillik ish stajiga ega. Mexanizator Usmon Matmusaev esa 32 yildan buyon shaxtada ishlab kelmoqda. U avval avval zaboy ishchisi bo‘lgan. Uchastka boshlig‘i Bobur Mayusupovni shaxtada ishlayotganiga chorak asrdan oshdi. Ularning har biri o‘z korxonasi haqida yaxshi so‘z aytadi, chunki bu shaxta ularning ikkinchi uyiga aylanib ulgurgan. Kon ustaxonalarida mehnat qilgan ustalar bir necha avlod yosh ta’mirchilarga kasb sirlarini o‘rgatdi. Ularning g‘amho‘rligi ostida Hikmat Muhiddinov, Davron Qo‘ziev, Daniil Tenga va boshqa ko‘plab yosh mutaxassislar qisqa muddat ichida kasb sirlarini mukammal o‘rganib oldilar.

– Jamoamizda Gulbahor va Gulnora Abdullaevalar, Mehri Shodieva singari o‘nga yaqin xotin-qiz mehnat qiladi. Ular yuk ko‘tarish moslamalari, shamollatish  operatorlari va shunga o‘xshash  vazifalarni bajarishadi, – deya qo‘shimcha qildi yuk ko‘tarish uchastkasi boshlig‘i Muxtor Parpiev. –Ular bizga yaqinda kelgan ikki yosh qizga ish ham o‘rgatishmoqda.

Ko‘mir shaxtasining maksim­al chuqurligi 125 metrni tashkil etadi va konchilar yoki yuklar lift orqali belgilangan joyga yetib borishida bu xodimalarning xizmati katta. Shuningdek, Halima Hoshimova, Marhamat Hamzaeva, Umida Berdieva kabi shamollatish agregatlari operatorlari shaxta o‘tish joylarini kechayu kunduz toza havo bilan ta’minlab kelmoqdalar.

Diana ANDREYEVA