Mahalliylashtirish markazi vakillari “O‘zbekko‘mir” AJ Tog‘-kon transport uskunalarini ta’mirlash zavodi filialida bo‘lishdi.

Mehmonlar korxonaning ishlab chiqarish jarayonlari, mavjud texnik imkoniyatlari va zavod quvvatlari bilan batafsil tanishdilar. Jarayonda ularga zavod  tog‘-kon transport texnikalarining asosiy uzellari va ehtiyot qismlarini ta’mirlash, qayta tiklash hamda ayrim detallarni mahalliylashtirish jarayonlari amalda ko‘rsatib berildi. Shu bilan birga, import o‘rnini bosuvchi mahsulotlarni ishlab chiqish, zamonaviy texnologiyalarni joriy etish hamda ishlab chiqarish salohiyatini oshirish bo‘yicha atroflicha fikr almashildi.

Uchrashuv yakunida tomonlar o‘zaro hamkorlikni yanada mustahkamlash, yangi mahalliylashtirish loyihalarini amalga oshirish va ishlab chiqarish tarmoqlarini kengaytirish bo‘yicha kelishuvga erishdilar.

Ma’lumot uchun,  “Tog‘-kon uskunalarini ta’mirlash zavodi” filiali ochiq kon ekskavatorlari, yuk tortish agregatlari va elektr uskunalarining to‘liq hamda joriy ta’mirlanishini bajaradi. Shuningdek, nostandart uskunalarni tayyorlash, ochiq kon ekskavatorlari uchun ehtiyot qismlar va tog‘-kon asbob-uskunalarini ishlab chiqarish, gazsimon kislorodni ishlab chiqarish, mahsulotlarni yetkazib berish ishlarini amalga oshirish bilan bir qatorda boshqa turdagi xizmatlarni ham ko‘rsatadi.