Hurmatli hamkasblar, qadrli konchilar va mehnat faxriylari!
 
Sizlarni 11 noyabr — O‘zbekiston kasaba uyushmalari kuni bilan “O‘zbekko‘mir” aksiyadorlik jamiyati Birlashgan kasaba uyushma qo‘mitasi nomidan samimiy muborakbod etamiz!
Kasaba uyushmasi — bu, avvalo, inson manfaatlarini himoya qilish, uning mehnatiga munosib baho berilishi, huquqlari ta’minlanishi va ijtimoiy qo‘llab-quvvatlanishi yo‘lida faoliyat yuritadigan jamoat birlashmasidir.
Ko‘mir sanoatida mehnat qilish oson emas. Yer ostida va ochiq konlarda, ishlab chiqarishning turli bo‘g‘inlarida faoliyat olib borayotgan har bir xodimning mehnati katta mas’uliyat va fidoyilik talab etadi. Ana shunday sharoitda ishchi-xodimlarning huquq va manfaatlarini himoya qilish, ularning mehnat va dam olish sharoitlarini yaxshilash, salomatligi va ijtimoiy farovonligiga ko‘maklashish kasaba uyushmasining eng muhim vazifasidir.
Jamiyatimizda ish beruvchi bilan ijtimoiy sheriklik asosida ish olib borish, jamoa shartnomasida belgilangan majburiyatlarning bajarilishi ustidan jamoatchilik nazoratini amalga oshirish, xodimlarning murojaat va takliflarini o‘rganish, mavjud muammolarga yechim topishga ko‘maklashish faoliyatimizning ustuvor yo‘nalishlaridandir.

Biz uchun kasaba uyushmasining samarasi faqat o‘tkazilgan tadbirlar yoki amalga oshirilgan ishlar soni bilan emas, balki qancha xodimning muammosi hal etilgani, qancha inson o‘zini himoyalangan va qadrlangan his qilgani bilan o‘lchanadi.
Shu bois har bir xodimning dardiga quloq tutish, uning manfaatini himoya qilish, mehnat muhofazasi talablariga rioya etilishiga e’tibor qaratish, xodimlar va ularning oila a’zolarini moddiy-ma’naviy qo‘llab-quvvatlash borasidagi ishlarni izchil davom ettiramiz.
Zero, ishchi-xodim manfaati himoya qilingan, mehnati qadrlangan jamoada hamjihatlik mustahkam bo‘ladi. Bu esa korxonada barqaror ishlab chiqarish va yuksak natijalarga erishishning muhim omillaridan biridir.
Fursatdan foydalanib, kasaba uyushmamiz safida faoliyat yuritayotgan barcha faollar, tarmoq vakillari, ishlab chiqarish ilg‘orlari, faxriylar hamda jamoamizning barcha a’zolariga samimiy minnatdorlik bildiramiz.
Barchangizga mustahkam sog‘liq, oilaviy baxt, xotirjamlik, farovonlik va sharafli mehnat faoliyatingizda muvaffaqiyatlar tilaymiz!
11 noyabr — O‘zbekiston kasaba uyushmalari kuni muborak bo‘lsin!
 
Hurmat bilan,
Abdunosir Qayumov,
“O‘zbekko‘mir” AJ
Birlashgan kasaba uyushma qo‘mitasi raisi