Ertalabki badantarbiya inson salomatligi uchun juda muhim. U organizmni uyg‘otadi, kayfiyatni ko‘taradi, kunni tetik va serg‘ayrat boshlashga yordam beradi. Doimiy jismoniy mashqlar mehnat unumdorligini oshirishga, sog‘lom turmush tarzini shakllantirishga xizmat qiladi.

“O‘zbekko‘mir” AJda har juma Sport kuni etib belgilangan. Shu munosabat bilan ijro apparati va filiallarda ertalabki jismoniy badantarbiya mashg‘ulotlarini muntazam o‘tkazish yaxshi an’anaga aylanib bormoqda.

Bugun Ijro apparati hovlisida navbatdagi jismoniy badantarbiya mashg‘ulotlari bo‘lib o‘tdi. Mashg‘ulotlarni Sport klubi raisi Muhriddin Abdullaev olib bordi. Atigi 10 daqiqa davom etgan mashg‘ulotlar ishtirokchilarga kunni tetik va ko‘tarinki ruhda boshlash imkonini berdi.

Korporativ jismoniy mashqlar nafaqat sog‘lom turmush tarzini qaror toptirishga, balki jamoada hamjihatlikni mustahkamlash, ijobiy muhitni shakllantirishga ham xizmat qiladi.

Ayrimlarda tortinish yoki uyalish hissi bo‘lishi mumkin. Biroq bunday mashg‘ulotlarda bunga o‘rin yo‘q. Aksincha, har bir ishtirokchi o‘z salomatligi va jamoaning sog‘lom muhitini shakllantirishga munosib hissa qo‘shadi.

Sog‘lom jamoa – muvaffaqiyatli jamoa!