Bugun Germaniyaning “Liebherr” kompaniyasi vakillari bilan “O‘zbekko‘mir” AJda uchrashuv o‘tkazildi. Uchrashuv jamiyat bosh direktorining birinchi o‘rinbosari O. Ismoilov boshchiligida o‘tkazildi.

Uchrashuvda “O‘zbekko‘mir” AJ bosh muhandisi V. Kuznesov, ATT filiali boshlig‘i Q. Xusainov hamda bosh muhandis R. Qandaxarov ishtirok etdi.

Muzokaralar ikki tomonlama manfaatli va konstruktiv ruhda o‘tdi. Dastlab Q. Xusainov bugungi kunda ATT filialida foydalanilayotgan Liebherr buldozerlari haqida to‘xtalib, ishlab chiqarish jarayonida yuzaga kelayotgan asosiy nosozliklar, asosan, texnikaning elektron tizimlari va avtomatlashtirilgan qismlariga to‘g‘ri kelayotganini ta’kidladi. Shuningdek, ushbu muammolarni bartaraf etish murakkab ekanligi va bu borada kompaniya tomonidan amaliy yordam ko‘rsatish maqsadga muvofiq bo‘lishi qayd etildi.

Kompaniya vakillari buldozer mashinistlarini tayyorlash va qayta tayyorlash, shuningdek, ularga xizmat ko‘rsatuvchi xodimlar malakasini oshirish masalalarida hamkorlik qilishga tayyor ekanini bildirdi.

Bosh muhandis V. Kuznesov esa avtoag‘darmalarga yuk qabul qilish jarayonida yuk ko‘tarish quvvati 50 tonnadan yuqori bo‘lgan g‘ildirakli buldozerlarga ehtiyoj mavjudligini ta’kidlab, ushbu turdagi texnikalarning afzalliklari haqida so‘z yuritdi.


 

O. Ismoilov mehmonlarga ehtiyot qismlarni xarid qilishda yuzaga kelayotgan muammolar haqida ma’lumot berib, kompaniya tomonidan taklif etilayotgan ehtiyot qismlar narxlari ayrim xususiy yetkazib beruvchilarga nisbatan yuqori ekani sababli sifatli mahsulotlarni xarid qilish imkoniyatlari cheklanayotganini qayd etdi.

Uchrashuv yakunida kompaniya vakillari buldozerlarga servis xizmatini yaxshilash masalasiga alohida e’tibor qaratilishini, xodimlarni o‘qitish yo‘nalishlari o‘rganib chiqilishini hamda moliyaviy masalalarda jamiyat imkoniyatlari inobatga olinishini ta’kidladi. Shuningdek, kelgusida o‘zaro hamkorlikni yanada mustahkamlash va rivojlantirishga tayyor ekanliklari bildirildi.