“O‘zbekko‘mir” aksiyadorlik jamiyatida xarid jarayonlarini yanada ochiq, tushunarli va samarali qilish maqsadida xalqaro konsalting kompaniyasi – KPMG tomonidan keng qamrovli tekshiruv (forenzik tahlil) o‘tkazildi.

KPMG – dunyodagi yirik va nufuzli kompaniyalardan biri bo‘lib, 140 dan ortiq mamlakatda faoliyat yuritadi va audit, soliq hamda konsalting xizmatlarini ko‘rsatadi.

Ushbu tekshiruv 2021–2024-yillar oralig‘idagi faoliyatni qamrab oldi. Jarayonda kompaniyaning xarid tizimi, ichki nazorat ishlari, hujjatlar bilan ishlash tartibi va axborot texnologiyalari holati batafsil o‘rganildi. Shuningdek, barcha jarayonlar amaldagi qonunlarga mos kelishi, boshqaruv qanchalik samarali ekani va nazorat tizimlari qay darajada ishlayotgani baholandi.

Tekshiruv natijasida “O‘zbek-ko‘mir” AJ uchun aniq taklif va rejalar ishlab chiqildi. Ular asosan quyidagilarni o‘z ichiga oladi:

– Xarid jarayonlarini to‘liq raqamlashtirish va barcha ma’lumotlarni yagona tizimga jamlash

– Ichki nazorat va komplayens (qoidalarga rioya qilish) tizimini kuchaytirish

– Xarid jarayonlarini yanada shaffof va samarali qilish.

Shuningdek, ombor va zaxiralarni boshqarishni yaxshilash ham muhim vazifa sifatida bel-gilandi. Buning uchun quyidagilar amalga oshiriladi:

– Yagona ma’lumotlar bazasini yaratish

– Markaziy va hududiy bo‘linmalardagi mahsulot harakatini onlayn (real vaqtda) kuzatish

– Ortiqcha yoki keraksiz zaxiralarni aniqlash

– Ularni samarali sotish yoki foydalanish mexanizmlarini ishlab chiqish.

Kompaniya ushbu o‘zgarishlarni bosqichma-bosqich amalga oshirishni rejalashtirgan. Asosiy maqsad xarid tizimini xalqaro standartlarga olib chiqish, ochiq-likni oshirish va resurslardan unumli foydalanishdan iborat.

Bundan tashqari, “O‘zbekko‘mir” xalqaro ESG (atrof-muhit, ijtimoiy mas’uliyat va korporativ boshqaruv) tamoyillarini joriy etish ustida ham ish olib bormoqda. Shu maqsadda maxsus kompaniya bilan shartnoma tuzilgan.

Ushbu hamkorlik doirasida:

– ESG bo‘yicha diagnostika o‘tkaziladi

– Issiqxona gazlari va atmosferaga chiqariladigan zararli moddalar miqdori o‘lchanadi

– Kompaniya ko‘rsatkichlari xalqaro standartlar asosida baholanadi

– Boshqa ilg‘or kompaniyalar bilan taqqoslanadi (bench-marking)

– Qaysi yo‘nalishlarda rivojlanish kerakligi aniqlanadi va amaliy choralar ishlab chiqiladi.

Yakunda esa xalqaro standartlarga mos barqaror rivojlanish hisoboti tayyorlanib, jamoatchilikka ochiq tarzda taqdim etilishi rejalashtirilgan.

Umuman olganda, “O‘zbekko‘mir” AJ o‘z faoliyatini zamonaviy talablar asosida yangilash, ochiqlikni oshirish va ish samaradorligini kuchaytirish yo‘lida izchil ish olib bormoqda.

Oybek ISMAILOV,

“O‘zbeko‘mir” AJ bosh direktorining birinchi o‘rinbosari

“O‘zbeko‘mir” gazetasi, 2026-yil 20-aprel, 4 (106)-son

https://t.me/gazetalar_sharhi/41366