“O‘zbekko‘mir” AJda energiya resurslarini tejash va yo‘qotishlarni kamaytirish masalalariga bag‘ishlangan yig‘ilish bo‘lib o‘tdi.

Jamiyat bosh direktori o‘rinbosari Erkin Yakubov raisligida o‘tkazilgan yig‘ilishda boshqarma va bo‘limlar rahbar xodimlari ishtirok etdi. Muloqot davomida respublikamizda amalga oshirilayotgan “yashil energetika” islohotlari, energiya tejamkorligi bo‘yicha davlat siyosati yuzasidan fikr almashildi.

Ta’kidlandiki, respublikamizda energiya resurslardan oqilona foydalanish va qayta tiklanuvchi energiya manbalarini keng joriy etish ustuvor vazifa sifatida belgilangan.

Mazkur yo‘nalishda 2025-yil 27-iyun kuni Bosh prokuror o‘rinbosari Sh.A. Aminov raisligida o‘tkazilgan videoselektor yig‘ilishida berilgan topshiriqlarni amaliyotga joriy etish maqsadida “O‘zbekko‘mir” AJda qator chora-tadbirlar belgilandi. Jumladan, jamiyat bosh direktori tomonidan 2025 yil 16 iyulda 274-sonli buyruq qabul qilindi.

Yig‘ilishda bosh direktor o‘rinbosari E.Yakubov ta’kidlaganidek, jamiyatda amalga oshirilayotgan energiya tejamkorlik siyosati nafaqat ish jarayonida, balki xodimlarning shaxsiy hayotida ham namoyon bo‘lishi zarur. Shu munosabat bilan jamiyat xodimlariga  o‘z xonadonlarida quyosh panellari va geliokollektorlar o‘rnatish tavsiya etilmoqda.

Bu uskunalar nafaqat tabiatni asraydi, balki iqtisodiy jihatdan ham foydalidir. Xodim o‘z ehtiyojidan ortiq elektr energiyasini davlatga sotish imkoniga ega bo‘ladi. Agar xodimlar uskuna o‘rnatishda moliyaviy qiyinchilikka duch kelsa, jamiyatga murojaat qilish orqali ish haqidan bo‘lib-bo‘lib to‘lash sharti bilan qurilmani sotib olishi mumkin. Bunda beriladigan qarz uchun hech qanday foiz undirilmaydi.

Ayni paytda, 500 kVt/soatdan ortiq elektr energiyasi iste’mol qilayotgan rahbar-xodimlar ro‘yxati shakllantirilgan bo‘lib, ularning “yashil energiya”ga o‘tishda ibrat ko‘rsatishi kutilayapti.

Yig‘ilishda ishlab chiqarish jarayonlarida ham energiya tejash bo‘yicha amalga oshirilayotgan ishlar muhokama qilindi. Xususan, “Temir yo‘l transpoti” filialiga umumiy sig‘imi 6 000 litr bo‘lgan quyosh geliokollektorlarini o‘rnatish topshirig‘ini qisqa vaqt mobaynida yakunlash zarur.

Shuningdek, energiya resurslarini talon-toroj qilish holatlarining oldini olish, qonunbuzarliklarni aniqlash va ularga jinoiy javobgarlik belgilanishini nazarda tutuvchi huquqiy takliflar tayyorlash bo‘yicha vazifalar ham belgilab olindi.

Yig‘ilishda jamiyat Birlashgan kasaba uyushma qo‘mitasi raisi A. Qayumov so‘zga chiqdi.

“O‘zbekko‘mir” AJ Axborot xizmati