Ertalabki badantarbiya bilan boshlangan ish kuni insonga kun davomida tetiklik va yaxshi kayfiyat bag‘ishlaydi. “O‘zbekko‘mir” AJda bugun, juma kuni ham ish kuni ana shunday ruhda boshlandi.

“Juma – sport kuni” etib belgilangani munosabati bilan Ijro apparati xodimlari Jamiyatning bosh binosi hovlisida jamlandi. Sport klubi raisi Muhriddin Abdullaev rahbarligida badantarbiya mashg‘ulotlari o‘tkazilib, xodimlar turli jismoniy mashqlarni bajardilar.

Shundan so‘ng Jamiyatning sport majmuasida tarkibiy bo‘linmalar o‘rtasida o‘zaro voleybol musobaqasi tashkil etildi. Bunday sport tadbirlari korxonada tobora an’ana tusiga kirib bormoqda.

Xususan, bu galgi voleybol musobaqasida qirq nafarga yaqin xodim ishtirok etdi. Maydonda to‘p uzatishlar, qiyqiriqlar, g‘alaba quvonchi va mag‘lubiyat alami mujassam bo‘ldi. Eng muhimi, musobaqa xodimlar o‘rtasida do‘stona muhitni yanada mustahkamladi.

Sport tadbiri yakuniga yetgach, xodimlar tetiklik va ko‘tarinki kayfiyatda o‘z ish joylariga qaytib, mehnat faoliyatini davom ettirdilar.

Axborot xizmati