18-may  – O‘zbekiston konchilik va metallurgiya sanoati xodimlari kuni! Shu munosabat bilan 16-may kuni “O‘zbekko‘mir” aksiyadorlik jamiyatida kasb bayramiga bag‘ishlangan tantanali tadbir bo‘lib o‘tdi.

Konchilarimiz kasb bayramini munosib mehnat sovg‘alari bilan kutib olmoqdalar. Ko‘mir qazib olish va iste’molchilarga yetkazib berish hajmlari yildan-yilga ortib, bu boradagi reja-topshiriqlar muvaffaqiyatli ado etilmoqda. Mashaqqatli va sharafli kasb egalari bo‘lgan konchilarimizni samarali mehnati har qancha tahsinga sazovor.

“Qurilish-montaj ishlari” filiali faollar zalida tashkil etilgan tantanali tadbirda Shahar hokimi A.Rayimov va jamiyat bosh direktori N.Dusmatov va boshqalar yig‘ilganlarni ayyom bilan qutlar ekan, konchilarning jasoratli  mehnatini alohida e’tirof etdilar.

Aksiyadorlik jamiyatida ishlab chiqarishni rivojlantirishga samarali hissa qo‘shgan va qo‘shib kelayotgan konchilar va mehnat faxriylarining katta guruhiga O‘zbekiston tog‘-kon sanoati va geologiya vazirligi, O‘zbekiston energetika, neft-gaz va geologiya xodimlari kasaba uyushmasi Respublika va viloyat Kengashlari, Angren shahar hokimligi hamda “O‘zbekko‘mir"  AJ tomonidan faxriy yorliq, tashakkurnoma, “Konchilik shuhrati” ko‘krak nishoni hamda qimmatbaho esdalik sovg‘alari tantanali ravishda topshirildi.

Tadbir respublika san’at ustalarining bayram dasturi namoyishi bilan yakunlandi.