Korrupsiya jamiyatda adolatsizlik, tengsizlik va aholining noroziligiga olib kelib, barcha sohadagi islohotlarning natijasiga salbiy ta’sir etadigan illatdir. Ushbu illatga qarshi kurashish doimiy jarayon bo‘lib, bu borada aybdorlarni jazolash emas, balki ko‘proq ushbu illatning oldini olish, jamoatchilikda korrupsiyaga qarshi murosasizlikni shakllantirish muhim ahamiyatga egadir.

O‘zbekiston Respublikasi Prezidentining “Korruptsiya bilan kurashish tizimini yana-da takomillashtirish bo‘yicha belgilangan ustuvor vazifalar ijrosini samarali tashkil etishga doir chora-tadbirlar to‘g‘risida”gi farmoni ham ana shu masalaga qaratilgan. “O‘zbekko‘mir” AJ “Avtomobil” texnologik transporti filialida korrupsiyaga qarshi kurashish bo‘yicha o‘tkazilgan seminar-treningda mazkur farmonning mohiyati haqida atroflicha ma’lumot berildi.

Tadbirda ta’kidlandi, bugungi kunda dunyo miqyosida korrupsiya bilan kurashish eng birlamchi masalaga aylangan. Ushbu illat nafaqat islohotlar yo‘liga jiddiy to‘sqinlik qilishi, balki belgilangan maqsadlarga erishishga ham bevosita tahdid soladi. Korrupsiyaning har qanday ko‘rinishi davlat va jamiyatning barqarorligi, tinchligi, taraqqiyoti uchun xavflidir. Uning oldini olish uchun yosh va qari, har bir inson ma’rifat bilan kurashsa, bu illatning ildizini quritishga erishish mumkin.

Tadbirda ishtirokchilar mavzu yuzasidan o‘zlarini qiziqtirgan savollarga javob oldilar.