Men uchun milliy libos – bu oddiy kiyim emas, balki o‘zligimizni ifoda etuvchi, yuragimizga milliy ruh bag‘ishlovchi iftixor manbaidir. Har bir millatning yuzi, qiyofasi uning liboslarida ham aks etadi. Biz milliy kiyimlarimiz orqali o‘tmish bilan kelajakni tutashtiramiz, o‘z an’analarimizga va qadriyatlarimizga hurmatimizni ko‘rsatamiz.

Albatta, ish payti xavfsizlik talab etiladigan sohalarda maxsus kiyim-kechak zarur. Masalan, konlarda yoki shaxtalarda ishlayotgan yurtdoshlarimiz uchun kaska, maxsus etik va kombinizon hayotiy zaruratdir. Lekin maxsus forma talab etilmaydigan joylarda  ko‘proq  milliy liboslarda yurishimiz kerak. Bu qulay, shu bilan birga milliy qadriyatlarimizga ham  hurmat ko‘rsatgan bo‘lamiz. 

Men shaxsan do‘ppini kundalik bosh kiyim sifatida doim kiyib yuraman. Chunki do‘ppi – faqat mato emas, u milliy iftixorimizni anglatib turadi. Sharoiti va mavsumiga qarab boshqa milliy kiyimlarimdan ham foydalanaman. Oilamizda ham milliy liboslar ardoqlanadi.

Ishxonamizda esa har juma kuni o‘tkazilayotgan milliy liboslar aksiyasi tobora kengayib bormoqda. Xodimlarimiz ushbu tashabbusga faol qo‘shilishmoqda. Ayniqsa, idora xodimlarida milliy liboslarni kiyish odatga aylanayotgani meni juda xursand qiladi.

Quvonarlisi, Jamiyatning boshqa filiallari ham bu aksiyada ishtirok etmoqda. Bu esa milliy qadriyatlarimizning targ‘ibotiga munosib hissa bo‘lib qo‘shilmoqda.

Afsuski, milliy liboslarimiz – do‘ppi, chopon yoki boshqa kiyimlar ko‘pincha faqat to‘y va marosimlardagina kiyila boshlagan edi. Lekin bugun targ‘ibot tadbirlari natijasida ular yana milliy iftixorimizga aylanmoqda. Chunki milliy libos bizning o‘zligimiz, an’analarimiz va qadriyatlarimizni anglatib turadi.

Menimcha, milliy liboslarimizni ko‘proq kiyishimiz zarur. Chunki millatimizga, tariximizga va kelajagimizga bo‘lgan hurmatimizdan ana shu  milliy liboslarimizdan boshlanadi.

Jumaboy Xudoyberdiyev,

“Ko‘mir ta’minot” MCHJ Sirdaryo viloyati filiali rahbari