16-iyun kuni O‘zbekiston Respublikasi Prezidenti Shavkat Mirziyoyev raisligida videoselektor yig‘ilishi bo‘lib o‘tmoqda.

Yig‘ilishda amalga oshirilayotgan islohotlar natijadorligi, hududlarda ishlarning borishi, aholining o‘ylantirayotgan masalalarga amaliy yechimlar topish masalalari muhokama qilinmoqda.

Davlat rahbari aholiga suyultirilgan gaz yetkazib berishdagi muammolarga alohida to‘xtaldi. Jumladan, Andijon va Surxondaryo viloyatlarida murojaatlarning 70 foizi aynan shu masalaga taalluqli ekani qayd etildi. Suyultirilgan gaz bo‘yicha 60–70 kunlik uzilishlar kuzatilayotgani keskin tanqid qilindi.

“Issiq kunlarda gazda shuncha muammo bo‘lsa, qishda odamlar qozonni nimada qaynatadi? Rahbarlarga so‘nggi ogohlantirish: bu masalaga ikki hafta ichida yechim topilsin, bo‘lmasa, o‘zi bilib joyini bo‘shatib qo‘ysin”, ‒ dedi Prezident.

Yoz oylarining issiq kelishi fonida elektr energiyasiga talab ortadi. Shu bois, Energiya samaradorlik agentligi va mutasaddi idoralarga quyidagi vazifalar yuklatildi:

‒ oyiga 500 kVt/soatdan ortiq elektr sarflaydigan xodimlar ro‘yxatini tuzish;

‒ ular uchun “yashil ta’mir” dasturi orqali kredit va subsidiya ajratish mexanizmini ishlab chiqish;

‒ zarur hollarda budjetdan tashqari jamg‘armalar hisobidan moliyaviy yordam ko‘rsatish.

Manbaa: https://t.me/Rasmiy_xabarlar_Official/52454