“Ko‘mir ta’minot” mas’uliyati cheklangan jamiyati Toshkent viloyati filialiga qarashli Angren ko‘mir ombori bugun har qachongidan gavjum.  Ushbu ombor  Angren, Ohangaron shaharlari va Ohangaron tumanidagi ko‘mirga ehtiyojmand budjet tashkilotlari va aholi iste’molchilariga xizmat ko‘rsatadi.

Budjet tashkilotlari talabini qondirgan omborxona xodimlari ayni kunlarda aholiga ko‘mir tarqatmoqda. Jarayon  sentabr oyida boshlangan va dekabrda tugaydi. Ombor mudiri Sardor Sharobiddinovning ta’kidlashicha, yil oxirigacha barcha xaridorlar albatta oladi. Har bir iste’molchi, ijtimoiy mavqei, yoshi va jinsidan qat’i nazar, davlat standarti bo‘yicha 2 tonna BZR navli ko‘mir olish huquqiga ega.

Joriy mavsum uchun hozirgacha  angrenliklar ehtiyoji uchun 1928,58 tonna, Ohangaron shahri va Ohangaron viloyatidan 1694,55 tonna ko‘mir tarqatildi.

‒ Yashirmayman, uyimizni “qora oltin” deb ataluvchi mana shu ko‘mir bilan isttamiz? ‒ deydi Angren “Bog‘i-Surx” mahallasida yashovchi X.Abdamitova. – Men bir necha yildan beri shu ombordan ko‘mir olaman. Ko‘mirning sifati va yetkazib berish shartlaridan mamnunman. Biz, iste’molchilarga ko‘rsatilayotgan e’tibor uchun “O‘zbekko‘mir” aksiyadorlik jamiyati ma’muriyatiga o‘z minnatdorchiligimni bildiramiz.

– Ikki tonnalik ko‘mirni olish uchun omborga keldim, – deya qo‘shimcha qiladi qorabog‘lik “ZiL” samosvalining haydovchisi J.Jaliev, – uch yildan beri shu yerda mahalliy ko‘mir olaman. Shu ikki tonna yoqilg‘ini tejamkorlik bilan ishlatsak, u butun qish mavsumiga bemalol yetadi. Konchilarga va ko‘mir ta’minotchilarga faqat rahmatlar aytamiz.

Diana ANDREYEVA