Har bir kasbning oʻz oʻrni va masʼuliyati borligi hech birimizga sir emas, ammo shunday bir kasb borki ular odamlarning manzilini yaqin, ogʻirini yengil qiladi. Aksiyadorlik jamiyatimizda ham avtomobil transporti xodimlari kunini nishonlash urfga aylangan. Bu bejiz emas, koʻmir ustki qatlamini ochishdan tortib, mahsulotni vagonlarga yuklab joʻnatishgacha boʻlgan jarayonlarda soha vakillarining oʻrni beqiyos.

Korxonamiz faoliyati kengayib borar ekan, avtomobil transporti sohasiga boʻlgan eʼtibor va talab ham ortib bormoqda. Yurtboshimiz tashabbusi bilan koʻmir sanoatini rivojlantirish maqsadida 80 mln. dollar miqdorda mablagʻlar yoʻnaltirilib, yangi texnikalar olib kelinmoqda. Endilikda haydovchilarimiz yanada shijoat va gʻayrat bilan yurtimiz aholisini koʻmir yonilgʻisi bilan taʼminlash yoʻlida hormay-tolmay mehnat qilishlari lozim. 

Yilning toʻrt faslida, ob-havo sharoitidan qatʼiy nazar, konlarimizda ishlab chiqarish jarayoni bir zum toʻxtagani yoʻq. Konchilarimiz kunni tunga ulab koʻmir qazib olish va isteʼmolchilarga yetkazib berishdek sharafli ishlarini davom ettirmoqdalar. 

Fursatdan foydalanib koʻmir sanoatimiz avtomobil transporti xodimlari va faxriylarini kasb bayrami bilan samimiy tabriklayman. Azamat konchi-haydovchilarimizga va ularning oilaga baxt, omad tilayman. Yurtimiz hamisha tinch, mehnatimiz barakali boʻlaversin.  

Abdunosir Qayumov,
"Oʻzbekkoʻmir" AJ Birlashgan kasaba uyushma qoʻmitasi raisi