“O‘zbekko‘mir» aksiyadorlik jamiyatida haftaning har juma kuni do‘ppi, atlas va adrasdan tikilgan kimlarda ishga chiqish odat tusiga aylandi. Bu bejiz emas.

Milliy liboslar xalqimizning ming yillik urf-odatlari, an’analari va ma’naviy qadriyatlarini o‘zida mujassam etgan. Ushbu liboslar xalqimiz tafakkuri, hayot tarzi va zehniyatini ifodalovchi bebaho madaniy boylik hisoblanadi.

Jamiyat korxonalarida milliy liboslarga bo‘lgan qiziqish ortib, ular qaytadan hayotga qaytmoqda. Bu jarayon nafaqat milliy hunarmandchilikning tiklanishiga, balki ajoyib mahalliy tikuvchi, bichuvchi, modelchi-dizaynerlarimiz uchun ham keng imkoniyatlar yaratmoqda. Har bir milliy kiyim ortida dizaynerning g‘oyasi, bichuvchining aniq hisobi va tikuvchining mahorati mujassam. Demak, ularni qo‘llab-quvvatlash – bu nafaqat milliy merosimizni asrash, balki yangi ish o‘rinlari yaratish va aholini bandlik bilan ta’minlashni ham anglatadi.

Jamiyat ijro apparati xodimlari milliy liboslarni targ‘ib etishda faol bo‘lib, milliy g‘ururni yuksaltirish, milliy o‘zlikni anglash, shuningdek, yosh avlod qalbida vatanparvarlik va milliy qadriyatlarga hurmat tuyg‘usini uyg‘otish ishlarida katta hissa qo‘shmoqdalar.