Ayni kunlarda respublika aholi iste’molchilarini arzonlashtirilgan mahalliy ko‘mir yoqilg‘isi bilan ta’minlash ishlari jadal sur’atlarda olib borilmoqda.

“Ko‘mir ta’minot” MCHJ Namangan viloyati filiali tasarrufida 8 ta hududiy ko‘mir ombori ishlab turibdi. Joriy kuz-qish mavsumi uchun ushbu omborlar tomonidan bugungi kungacha aholiga 113 ming 700 tonnadan ziyodroq ko‘mir tarqatildi. Ayni paytda omborlarda 3 ming 450 tonna zaxira bor

Joriy mavsum uchun hududiy omborlar orqali viloyat aholisiga 183 ming tonna ko‘mir yetkazib berish rejalashtirilgan.

Pop tumani tog‘li hudud bo‘lib, bu yerda mavjud 77 mahallaning 61 tasi tabiiy gazga ulanmagan.

“Ko‘mir ta’minot” MCHJ Namangan viloyati filialiga qarashli Pop tuman hududiy ko‘mir ombori tomonidan aholiga qish mavsumi uchun hozirgacha 11 ming 480 tonna ko‘mir tarqatildi.

Bugun ko‘mir omboriga “O‘zbekko‘mir” AJ tomonidan ortib yuborilgan yana to‘rt vagon mahalliy ko‘mir tushirildi.

Mahsulot aholiga onlayn ro‘yxatga muvofiq mahalla fuqarolar yig‘ini vakillari ishtirokida tarqatilmoqda.

12-noyabr kuni “O‘zbekko‘mir” AJ Axborot xizmati rahbari Ne’mat Dushayev tomonidan viloyatdagi Pop va Chust ko‘mir omborlari faoliyati o‘rganildi. Jarayonda ko‘mir ta’minotchilar va aholi iste’molchilari bilan arzonlashtirilgan mahalliy ko‘mir va uni tarqatish tartiblari to‘g‘risida tushuntirish ishlari olib borildi.

Fotosuratlarda: Pop va Chust ko‘mir omborida aholiga ko‘mir tarqatish jarayonidan lavhalar.

Fotosuratlar muallif: Ilhom Bozorboyev