21 oktabr – O‘zbek tili bayrami munosabati bilan “O‘zbekko‘mir” aksiyadorlik jamiyatida ma’naviy-ma’rifiy tadbir o‘tkazildi.

“Angren ko‘mir koni” filialida tashkil etilgan tadbirda jamiyat ijro apparati hamda barcha filial va bo‘linmalardan vakillar ishtirok etdi.

O‘zbek tiliga davlat tili maqomi berilganiga 36 yil to‘lmoqda. Bu yilgi bayram ona tilimizning nufuzi nafaqat mamlakatimizda, balki jahon miqyosida ham ortib borayotgan davrga to‘g‘ri kelmoqda.

Shu ma’noda, O‘zbekiston Respublikasi Prezidenti Shavkat Mirziyoevning tashabbusi bilan keyingi yillarda davlat tili siyosatini takomillashtirish, uning nufuzini oshirish va ish yuritish amaliyotida to‘liq qo‘llash bo‘yicha qator muhim chora-tadbirlar amalga oshirilmoqda. Davlat rahbari o‘z nutqlarida:

“Ona tili – millatning ruhi va g‘ururi, xalqning qalb olamidir”, deb ta’kidlagani har bir fuqaro uchun dasturilamal bo‘lib xizmat qilmoqda.

Tadbir mehmoni, taniqli voiz, O‘zbekiston Yozuvchilar uyushmasi a’zosi Rahimboy Jumaniyozov hamda boshqa so‘zga chiqqanlar ona tilimizning betakror go‘zalligi, uning nufuzini oshirish va kundalik ish faoliyati hamda muloqotda to‘g‘ri va samarali foydalanish muhimligini ta’kidladilar.

Bayram munosabati bilan “O‘zbekko‘mir” AJda ilgari davlat tilida ish yuritish mavzusida seminar tashkil etilgan bo‘lib, unda xodimlarning xat-savodi va til bilimini sinovdan o‘tkazish maqsadida diktant yozuv tanlovi o‘tkazilgan edi. Tadbirda mazkur tanlov g‘oliblari alohida e’tirof etilib, ularga esdalik sovg‘alari topshirildi.

Ona tilimizning jozibasi va go‘zalligiga bag‘ishlangan she’rlar, qo‘shiqlar va kuylar yangradi. Tadbir ishtirokchilari ona tiliga bo‘lgan muhabbat va hurmatni yanada yuksak ruhda ifoda etdilar.

Dilnoza Mirzakulova,
“O‘zbekko‘mir” AJ davlat tilida ish yuritish bo‘yicha mutaxassis