2026-yil 14–16-oktabr kunlari Moskva shahrida ”Rossiya energetika haftaligi ‒ 2026” IX xalqaro forumi bo‘lib o‘tmoqda. Yoqilg‘i-energetika sohasidagi muhim xalqaro tadbirlardan biri bo‘lgan mazkur forum energetika bozorining dolzarb masalalarini muhokama qilish, xalqaro hamkorlikni rivojlantirish va sohaning istiqbollarini belgilashga qaratilgan.

Forumda “O‘zbekko‘mir” AJ bosh direktorining o‘rinbosari Oybek Ismailov ham ishtirok etmoqda. Bu haqida hozirda Moskva shahrida bo‘lib turgan “O‘zbekko‘mir” AJ Axborot xizmati mutaxassisisi Abdunodir Nosirov xabar qildi.

“Roskongress” jamg‘armasi tomonidan tashkil etilgan forum Rossiya Federatsiyasi Hukumati, Rossiya Energetika vazirligi va Moskva hukumati ko‘magida o‘tkazilmoqda. Unda davlat idoralari vakillari, yirik energetika kompaniyalari rahbarlari, xorijiy delegatsiyalar, investorlar, olimlar va sohaviy ekspertlar qatnashmoqda.

Forumning bu yilgi mavzusi ‒ “Energiya resurslari va texnologiyalardan kelajak farovonligi sari”. Tadbirning asosiy maqsadi energetika sohasidagi global o‘zgarishlarni muhokama qilish, xalqaro hamkorlikni mustahkamlash va yoqilg‘i-energetika majmuasini rivojlantirishga qaratilgan istiqbolli yechimlarni ishlab chiqishdan iborat.

Forumning birinchi kuni ‒14-oktabr Yoshlar kuni sifatida tashkil etildi. Unda talabalar, yosh mutaxassislar va energetika sohasi vakillari ishtirok etib, o‘z loyihalarini taqdim etish hamda tarmoq rahbarlari bilan muloqot qilish imkoniga ega bo‘ldi. Shuningdek, «Гостиный двор» majmuasida yoqilg‘i-energetika majmuasi uchun uskunalar va texnologiyalar ko‘rgazmasi ochildi.

15–16-oktabr kunlari forumning asosiy ishbilarmonlik dasturi o‘tkazilmoqda. Dastur 40 dan ortiq sessiyani o‘z ichiga olib, neft va gaz bozorlarining transformatsiyasi, elektr energetikasiga investitsiyalar, yangi energetika texnologiyalari, xalqaro hamkorlik, ekologiya va energiya samaradorligi, ta’lim hamda kadrlar tayyorlash kabi yo‘nalishlarni qamrab oladi.

Muhokamalarda ko‘mir energetikasiga zamonaviy texnologiyalarni joriy etish, tarmoqqa investitsiyalarni jalb qilish, ishlab chiqarish samaradorligini oshirish va energetika sohasining texnologik salohiyatini mustahkamlash masalalariga ham e’tibor qaratilmoqda.

“O‘zbekko‘mir” AJ vakilining mazkur xalqaro tadbirda ishtiroki ko‘mir sanoatidagi ilg‘or tajribalarni o‘rganish, zamonaviy texnologiyalar bilan tanishish va xalqaro sohaviy hamkorlik aloqalarini rivojlantirish nuqtai nazaridan muhim ahamiyat kasb etadi.

Forum haqidagi batafsil ma’lumotlar bilan “Rossiya energetika haftaligi”ning rasmiy veb-sayti orqali tanishish mumkin.