“O‘zbekko‘mir” AJning “Transport” filialida 2-alohida harbiylashtirilgan kon-qutqaruv vzvodi ishtirokida navbatdagi rejali-taktik o‘quv mashg‘ulotlari bo‘lib o‘tdi. Mashg‘ulotlarga vzvod komandiri yordamchisi Abror Ismailov rahbarlik qildi.

Shuningdek, mashg‘ulotlarda yong‘in-qutqaruv bo‘linmasi xodimlari, filial uchastkasining ishchilari hamda tez tibbiy yordam xodimlari ishtirok etdi.

O‘quv jarayonini “O‘zbekko‘mir” AJ fuqaro muhofazasi va favqulodda vaziyatlar bo‘limi boshlig‘i O‘tkir Inoyatov, “Transport” filiali FVB xodimi Ulug‘bek Ergashev, harbiylashtirilgan kon-qutqaruv vzvodi komandiri yordamchisi Abror Ismailov, “Transport” filiali bosh muhandisi Kayrat Kusainov va boshqalar kuzatib borishdi.

Mashg‘ulot ssenariysiga ko‘ra, baxtsiz hodisa natijasida jabrlangan ikki nafar fuqaroni qutqarish, ularga tezkor birinchi yordam ko‘rsatish hamda yong‘inni bartaraf etish vazifalari bajarildi.

Qutqaruvchilar harakati muvofiqlashgan holda amalga oshirildi: jabrlanuvchilar tibbiy zabillarda olib chiqildi, birinchi tibbiy yordam ko‘rsatildi va tez yordam xodimlariga topshirildi. Yong‘in o‘chiruvchilar esa yong‘in o‘chog‘ini muvaffaqiyatli bartaraf etdi.

Abror Ismailovning ta’kidlashicha, qutqaruvchilar faoliyatida tibbiy va jismoniy tayyorgarlik ustuvor ahamiyatga ega. Yil davomida sanoat hududlarida muntazam ravishda shunday mashg‘ulotlar o‘tkazilib, ishchi-xizmatchilarga xavfsizlik qoidalari tushuntirib boriladi.