“O‘zbekko‘mir” aksiyadorlik jamiyati tomonidan “Yashil belbog‘” umummilliy loyihasi doirasida “Konchilar bog‘i” tashkil etilmoqda. Shu maqsadda muntazam hasharlarda daraxt ko‘chatlari ekilmoqda. 22-23-mart kunlari ham shunday hasharlarda o‘tkazildi. Ish boshlanganidan buyon 2 ming tup terak ko‘chatlari ekildi.

Jamiyat bosh direktorining 2023 yil 21-fevraldagi 80-sonli buyrug‘i asosida o‘tkazilayotgan tadbirlarda o‘nlab xodimlar faol qatnashmoqda.

Jamiyat bosh ekolog Akbar Yoqubovning ma’lumot berishicha, bog‘ uchun Toshkent viloyati suv omborlari boshqarmasidan Angren daryosi bo‘yidagi 1,3 gektar qarovsiz bo‘sh yer maydoni o‘n yilga ijara olinadi. Bu yerda o‘n ming tup kaliforniya teragi ekib o‘stiriladi.

‒ Ekkaning emas, ko‘kartirganing hisob, deydilar. Yaratilayotgan bog‘da daraxtlar to‘liq ko‘kartiriladi va kelgusi besh yil davomida ularni muhofaza qilish, parvarishlash, zararkunanda hasharotlar va kasalliklardan himoya qilish bo‘yicha aniq choralar belgilab olinadi. Suvni tejash maqsadida bog‘da tomchilab sug‘orish tizimi yo‘lga qo‘yiladi, ‒ deydi Akbar Yoqubov.

Bog‘ parvarishi uchun bog‘bonlar ajratilmoqda. Hademay ular uchun xizmat uylar quriladi, nasos stansiyasi va tomchilab sug‘orish jihozlari o‘rnatiladi.

Konchilar bahorgi ekish mavsumida shu bilan cheklanib qolishmaydi. Jamiyat hududidagi yana to‘rt gektar yer maydoni rekul’tivatsiya qilinadi va ushbu joyda ham mevali va qurilishbop daraxt ekilib, “Konchilar bog‘i” tashkil qilinadi.