O‘zbekiston Respublikasi Tog‘-kon sanoati va geologiya vazirligida “OKMK hamkorlari” xalqaro ayol-liderlar hamjamiyatining to‘rtinchi uchrashuvi bo‘lib o‘tdi.

Tadbirda “O‘zbekko‘mir” AJning kasbiy salohiyatga ega malakali ayol xodimlari ishtirok etishdi.

Tadbir ochiq va konstruktiv muloqot ruhida tashkil etilib, unga Tog‘-kon sanoati va geologiya vazirining birinchi o‘rinbosari F. Xamidova hamda KfW IPEX-Bank (Germaniya) biznesni rivojlantirish direktori, Sharqiy Yevropa, Markaziy Osiyo va Janubiy Kavkaz bo‘yicha rahbari Yekaterina Galitsina moderatorlik qildi.

Uchrashuvda vazirlik tizimidagi korxona va tashkilotlar rahbar ayollari va faol xodimalari, shuningdek, vazirlikning xorijiy hamkor kompaniyalarining, jumladan Germaniyaning O‘zbekistondagi elchixonasi vakillari ishtirok etdi. Bank sohasi, moliya, sog‘liqni saqlash, davlat boshqaruvi va tadbirkorlik kabi turli yo‘nalishlarda faoliyat yuritayotgan yuzdan ortiq ishtirokchi tadbirda qatnashdi.

Muloqotning asosiy maqsadi professional aloqalarni rivojlantirish, tajriba almashish va tog‘-kon sanoati hamda iqtisodiyotda ayol-liderlarning o‘rnini yanada kuchaytirishdan iborat bo‘ldi.