Mamlakatimizda mo‘tabar ayol zotiga hamisha munosib ehtirom ko‘rsatib kelinmoqda. Bu bejizga emas. Xotin-qizlarning davlat va jamiyat hayotidagi o‘rni va nufuzi ortib bormoqda. Ko‘p ming kishilik “O‘zbekko‘mir” aksiyadorlik jamiyati ishlab chiqarishida  ham ular o‘zlarining ko‘p yillik samarali mehnati, yuqori kasbiy malakasi va mahorati bilan faol qatnashib, ko‘mir sanoati rivojiga munosib hissa qo‘shib kelmoqdalar.

Bugungi kunda jamiyat tizimidagi korxonalarda 1 ming 100 nafar xotin-qiz samarali faoliyat olib bormoqda. Konstitutsiyamizning 46-moddasida belgilab qo‘yilganidek, ular  erkaklar bilan teng huquqlidirlar. Ayni paytda Jamoa shartnomasiga ko‘ra xotin-qizlar uchun qo‘shimcha qator imtiyozlar va kafolatlar belgilab berilgan. Xususan, homilador ayollar, farzandi ikki yoshgacha, uch yoshgacha, 12 va 16 yoshgacha to‘lguncha ular alohida-alohida va muayyan imtiyozlardan foydalanmoqdalar. Farzandi uch yoshga to‘lmagan ishlovchi ayollar uchun ish vaqti bir soatga qisqartirilgan.

Jamoa shartnomasida 8 mart bayrami munosabati bilan pul mukofoti ham joriy etilgan.

Bir so‘z bilan aytganda, jamiyatimizda ayollar uchun unumli ishlashi, shuningdek oilada bola tarbiyasi bilan shug‘ullanishi uchun zarur sharoitlar yaratib berilmoqda.

Bahor ‒ fusunkor fasl, mart oyi esa bayramlarga boy. Bu ham bejiz emas. Fursatdan foydalanib, jamiyatimiz xotin-qizlarini 8 mart ‒ Xalqaro xotin-qizlar kuni bilan samimiy muborakbod etamiz. Bayramingiz qutlug‘ bo‘lsin, aziz konchi opa-singillar!

Abdunosir Qayumov,

Birlashgan kasaba uyushma qo‘mitasi raisi