13-iyun kuni “O‘zbekko‘mir” AJ Markaziy dispetcherlik markazida “Yoshlar oyligi” tadbirlari doirasida “Kiberxavfsizlik: mutaxassislar va yoshlar muloqoti” mavzusida davra suhbati tashkil etildi.

Tadbirda yosh mutaxassis va filiallar yoshlar yetakchilari ishtirok etdi.

Yig‘ilishni Jamiyat Yoshlar ittifoqi yetakchilar Kengashi raisi D.Abdurahmonov ochib, “Yoshlar oyligi” doirasidagi tadbirlarning ma’naviy va amaliy ahamiyatini ta’kidladi.

Tadbir jarayonida axborot texnologiyalari va komplaens xizmatlari mutaxassislari kiberhujumlar, shaxsiy ma’lumotlarni o‘g‘irlash, onlayn firibgarlik holatlari va ulardan himoya choralari haqida ma’lumot berishdi. Xususan, begona shaxslar bilan shubhali aloqa qilish, noma’lum Telegram kanallardan foydalanish shaxsiy va korporativ ma’lumotlar xavfsizligiga jiddiy tahdid solayotgani qayd etildi.

Angren shahar IIB tezkor xodimlari U. Sultonov va T. Xoldorov internet va bank tizimlari orqali amalga oshirilayotgan jinoyatlarning oldini olish bo‘yicha huquqni muhofaza qiluvchi organlar tajribasi bilan bo‘lishishdi.

Ish joyidagi moddiy boyliklarni o‘zlashtirish, hujjat soxtalashtirish kabi holatlar qonuniy oqibatlari — jinoiy va ma’muriy javobgarlikka sabab bo‘ladi. Har bir xodim, ayniqsa yoshlar, o‘z vazifasini halollik, qonunga hurmat va mas’uliyat bilan bajarishi zarur. Tadbirda ana shular haqida ham so‘z yuritildi.

Komplaens xizmati rahbari U. Ro‘ziev esa o‘z so‘zida yosh mutaxassislarning shaxsiy pozitsiyasi va ahloqiy barqarorligi axborot xavfsizligi va korrupsiyaga qarshi immunitetda hal qiluvchi ahamiyatga ega ekanini qayd etdi.

Davra suhbatida ishtirokchilar o‘zlarini qiziqtirgan savollarga javoblar oldilar.

Ushbu uchrashuv axborot xavfsizligi, huquqiy ong va ichki tartibni mustahkamlashda muhim qadam bo‘ldi.